លើកចុងក្រោយដែលបិសាចក្រហមឈ្នះពាន Premier League គឺនៅឆ្នាំ ២០១៣ គ្រាដែលអ្នកចាត់ការលោក Sir Alex Ferguson ប្រកាសចូលនិវត្ត លុះក្រោយៗបន្ទាប់មក United ស្គាល់ត្រឹមរសជាតិពានតូចៗតែប៉ុណ្ណោះ។
ជាសារយល់ឃើញពីអតីតជើងចាស់លោក Ryan Giggs បាននិយាយថា សម្រាប់បិសាចក្រហមត្រូវរង់ចាំអាចដល់ ២ ទសវត្សទៀតដើម្បីគ្រងពានរង្វាន់លីគកំពូលអង់គ្លេសសារជាថ្មី។
ប្រាប់សារព័ត៌មានកាលពីពេលថ្មីៗនេះ លោក Giggs និយាយ៖ “ពិតណាស់ ១០០ ភាគរយ គឺអាច ១៥ ទៅ ២០ ឆ្នាំទៀត [សម្រាប់ Man Utd] ព្រោះពេលនេះ Klopp និង Guardiola ក៏កំពុងក្រវែលជុំវិញពានហ្នឹងបន្តទៀតដែរ”។
លោកបន្ថែម៖ “ពួកគេ [Liverpool និង Man City] មានធនធានកីឡាករ ដូចដែលយើងបានឃើញសម្រាប់ Liverpool ពេលចុងក្រោយរបស់ Liverpool គឺនៅឆ្នាំ ១៩៩០ ហើយ Klopp ប្រើពេល ៤ ឆ្នាំកន្លះដើម្បីឈ្នះវាម្តងទៀត វាក៏យូរណាស់ទៅហើយ ប៉ុន្តែអ្នកត្រូវមើលដែរនូវអ្វីដែល Klopp បានធ្វើ ដោយគាត់ពង្រឹងក្រុមរៀងរាល់រដូវកាល ហើយថែមទាំងបានឈ្នះ Champions League ថែមទៀត”៕
ប្រភព៖ AF