ក្រោយការចាកចេញរបស់លោក Josep Maria Bartomeu ពេលនេះស្ថានភាពក្លឹប Barcelona ត្រូវបានគេមើលឃើញថា អាចនឹងកែប្រែលើផែនការណ៍ថ្មីឡើងវិញ។ ក្នុងចំណោមបេក្ខភាពប្រធានក្លឹបថ្មីធំៗ ក៏មានលោក Victor Font បានបង្ហើបពីយោបល់របស់លោកចំពោះរឿងរ៉ាវនេះ។
លោកបានពន្យល់ថា Barcelona គួរតែនាំយកអតីតជើងចាស់ដែលធ្លាប់មានឈ្មោះល្បីរន្ទឺនៅអ្នកមានបុណ្យ មកចូលរួមអភិវឌ្ឍក្រុមឡើងវិញ មិនថាតែស្ថិតក្នុងតំណែងណាក៏ដោយ។
ប្រាប់សារព័ត៌មាន Sky Sports លោក Victor Font និយាយ៖ “នេះជាគម្រោងការណ៍របស់យើងក្នុងការកសាងក្រុមដ៏រឹងមាំនិងមានភាពប្រកួតប្រជែង ហើយយើងពិតជាសំណាងដែលនៅ Barcelona មានប្រព័ន្ធមួយដែលលោក Johan Cruyff បានរៀបចំតាំងពីដើមរៀងមក”។
លោកបន្ត៖ “ហើយវីរបុរសរបស់យើងជាច្រើនបានយល់ច្បាស់អំពីប្រព័ន្ធលេងមួយនេះ និងជាមនុស្សដែលអ្នកគាំទ្រស្រលាញ់ផងដែរ ដូចជា Pep Guardiola, Xavi, Andres Iniesta និង Carles Puyol ដោយយើងត្រូវការពួកគេដើម្បីឲ្យមកចូលរួមក្នុងផែនការណ៍នេះ”៕ ប្រភព៖ Marca