ប៉ុន្មានថ្ងៃនេះឃើញមានការចាប់អារម្មណ៍ជាច្រើនពីអ្នកប្រើប្រាស់បណ្ដាញសង្គមជុំវិញរូបភាពគំនូរដែលគូរដោយដៃ បង្ហាញពីមុខមាត់បុគ្គលល្បីៗក្នុងវិស័យកីឡាបាល់ទាត់។ បើតាមការអង្កេតមើល អ្នកនៅពីក្រោយស្នាដៃគំនូរដ៏ស្រស់ស្អាតទាំងនោះ ការពិតគឺជាយុវជនខ្មែរ មានទីលំនៅក្នុងខេត្តត្បូងឃ្មុំ។
ប្រភពរូបភាព៖ Bunna Real
ប្រភពរូបភាព៖ Bunna Real
តាមរយៈការសាកសួរដោយផ្ទាល់ យុវជនដែលមានសមត្ថភាពអាចគូររូបស្អាតៗទាំងនោះ គឺមានឈ្មោះ ប៊ុន ណារស់ និងឈ្មោះលើគណនីហ្វេសប៊ុក Bunna Real។
ប្រាប់ទំព័រ CTS Sports យុវជនវ័យ ២៣ ឆ្នាំបង្ហើបឲ្យដឹងថា៖ “ខ្ញុំជាមនុស្សស្រលាញ់វិស័យកីឡាបាល់ទាត់តាំងពី ៦ ឬ ៧ ឆ្នាំមុនមកម្ល៉េះ ហើយរាល់សមិទ្ធផលនៃរូបគំនូរដែលបានគូរចេញ គឺជាទេពកោសល្យពីកំណើត និងប្រើប្រាស់បេះដូងដែលស្រលាញ់បាល់ទាត់មកធ្វើការលាយឡំ”។
យុវជន ប៊ុន ណារស់
ចំពោះតម្រូវការពេលវេលាក្នុងការគូររូបមួយសន្លឹកៗ យុវជនដែលជាអ្នកគាំទ្រក្លឹប Real Madrid រូបនេះបានសង្កត់ធ្ងន់ថា៖ “ប្រហែលចំណាយពេល ២ ថ្ងៃប្រសិនដាក់ចិត្តគូរ តែខ្ញុំគូរតាមអារម្មណ៍ ពេលណាចង់គូរក៏គូរ ដោយមិនកំណត់ពេលវេលាច្បាស់លាស់នោះទេ”។
យុវជន ប៊ុន ណារស់
ដោយឡែកចំពោះរូបគំនូរនៃកីឡាករខ្មែរ រូបគេបានបង្ហើបថា៖ “ខ្ញុំក៏កំពុងគូររូប ចាន់ វឌ្ឍនាកា ដែរ តែមិនសូវមានពេលគ្រប់គ្រាន់ ទើបមិនទាន់សម្រេចបាន ១០០ ភាគរយ”។
រូបភាព៖ Bunna Real
គួរបញ្ជាក់ថា រូបគំនូរដែលគេធ្លាប់សម្រេចបានកន្លងមានដូចជារូបរបស់ Cristiano Ronaldo, Lionel Messi, Paulo Dybala, Joao Felix អ្នកចាត់ការ លោក Sir Alex Ferguson និងលោក Zinedine Zidane ជាដើម៕