លោក Josep Maria Bartomeu និងក្រុមប្រឹក្សាភិបាលបានប្រកាសលាលែងពីតំណែងជាប្រធានក្លឹប Barcelona នៅថ្ងៃទី ២៨ តុលា ឆ្នាំ ២០២០ ក្រោយចូលកាន់តំណែងអស់រយៈពេលជាង ៦ ឆ្នាំ។
បុរសវ័យ ៥៧ ឆ្នាំបានប្រកាសនូវដំណឹងដ៏ភ្ញាក់ផ្អើលនេះឡើង មុនរយៈពេលប៉ុន្មានខែនៃការបោះឆ្នោតជ្រើសរើសប្រធានក្លឹបថ្មី ដែលកំណត់ធ្វើឡើងនៅខែមិនា ឆ្នាំ ២០២១។ ក្រោមការដឹកនាំរបស់អតីតប្រធានក្លឹបសញ្ជាតិអេស្ប៉ាញច្រើនឆ្នាំមកនេះ អ្នកមានបុណ្យក៏ទទួលបានជោគជ័យមួយផ្នែកធំ តែក៏លាយឡំនឹងភាពរកាំរកូសជាច្រើនផងដែរ។
ផ្សាភ្ជាប់នឹងរឿងរ៉ាវនេះ CTS Sports សូមបង្វែរឲ្យអ្នកគាំទ្រ បានដឹងពីការចុះហត្ថលេខាខ្ជះខ្ជាយលុយធំបំផុតទាំង ៥ ក្រោមការដឹកនាំរបស់លោក Bartomeu៖
៥) Arda Turan ក្លឹបចាយអស់ ៣៤ លានអឺរ៉ូ
Barcelona បានចាយលុយ ៣៤ លានអឺរ៉ូ នាំយក Turan មកចូលរួមនៅរដូវក្តៅឆ្នាំ ២០១៥ ប៉ុន្តែរូបគេត្រូវរង់ចាំដល់ខែមករា ឆ្នាំបន្ទាប់ទើបបានបង្ហាញខ្លួនជាលើកដំបូង។ រយៈពេលជាង ៣ ឆ្នាំកីឡាករសញ្ជាតិទួរគី ឈរជើងលើទីលានឲ្យ Barca បានតែ ៣ ០១៧ នាទីគត់ និងរកបាន ១៥ គ្រាប់ហើយ Assist ១១ លើក មុនការផ្ទេរចេញនៅឆ្នាំ ២០១៨ ដោយគ្មានបានតម្លៃខ្លួនសូម្បីតែមួយសេន្ត។
៤) Andre Gomes ក្លឹបចាយអស់ ៣៧ លានអឺរ៉ូ
Barcelona បានយក Gomes ចេញពី Valencia នៅរដូវក្តៅឆ្នាំ ២០១៦ តែដល់រយៈពេល ៣ ឆ្នាំបន្ទាប់សម្រេចលក់ឲ្យទៅ Everton វិញ ដោយព្រមខាតខ្ទង់ ១២ លានអឺរ៉ូ។ កំឡុងពេល ៣ រដូវកាលនៃការមកដល់របស់កីឡាករអេស្ប៉ាញ គេបានឈរជើងលើទីលានឲ្យ Barca តែ ៣ ៨៣៧ នាទីប៉ុណ្ណោះ ហើយរកបានត្រឹម ៣ គ្រាប់និង Assist ៤ លើក។
៣) Antoine Griezmann ក្លឹបចាយអស់ ១២០ លានអឺរ៉ូ
ទទួលស្គាល់ថា កីឡាករបារាំងនៅសល់ពេលវេលាដើម្បីបង្ហាញពីគុណភាពលេងរបស់គេនៅ Barcelona ប៉ុន្តែឆ្លងកាត់រយៈពេលជាង ១ ឆ្នាំមកនេះ ការចាយអស់ ១២០ លានអឺរ៉ូលើ Griezmann រាប់ថា ជារឿងខកចិត្តបណ្តើរៗទៅហើយ។
បុរសវ័យ ២៩ ឆ្នាំកាលនៅ At ជោគជ័យខ្លាំង ជាមួយនឹងការលេងនៅតំណែងប្រយុទ្ធកណ្តាល ប៉ុន្តែសម្រាប់ការមកដល់ Barca គេត្រូវបង្ខំចិត្តលេងតំណែងប្រយុទ្ធស្លាបដែលមិនត្រូវនូវអ្វីដែលគេប៉ិនប្រសព្វទាល់តែសោះ។ នៅ ៥៣ ប្រកួត Griezmann ទើបរកបាន ១៥ គ្រាប់និង Assist ៤ លើក ហើយតម្លៃខ្លួនរបស់គេបច្ចុប្បន្នធ្លាក់ចុះ ៤០ លានអឺរ៉ូឯណោះ។
២) Ousmane Dembele ក្លឹបចាយអស់ ១៣០ លានអឺរ៉ូ
Demmbele បានចាកចេញពី Dortmund មកគ្រោងអាវលេខ ១១ ជំនួស Neymar ជាមួយតម្លៃខ្លួន ១៣០ លានអឺរ៉ូ។ ប៉ុន្តែរយៈពេល ៣ ឆ្នាំជាមួយម្ចាស់ដី Camp Nou កីឡាករបារាំងញាំញីដោយសាររបួសឥតឈប់ ពោលគ្រាន់តែសម្រាកព្យាបាលចាយពេលជិត ១ ឆ្នាំកន្លះទៅហើយ។ បច្ចុប្បន្នបើ Barcelona ព្រមលក់ក៏ខាតយ៉ាងតូច ៧០ លានអឺរ៉ូដែរ ទាំងដែលការបង្ហាញខ្លួនទើបចូលរួមបាន ៧៨ លើក រកបាន ២០ គ្រាប់និង Assist ១៧ លើក។
១) Philippe Coutinho ក្លឹបចាយអស់ ១៤៥ លានអឺរ៉ូ
ការចុះហត្ថលេខាយក Coutinho ជាការផ្ទេរចូលនៅតម្លៃបំបែកកំណត់ត្រារបស់ក្លឹប ក្រោយមើលឃើញគុណភាពលេងរបស់កីឡាករប្រេស៊ីលនៅ Liverpool ហាក់មានភាពល្អខ្លាំង។
រដូវកាលដំបូងជាមួយ Barcelona បុរសវ័យ ២៨ ឆ្នាំ រកបាន ១១ គ្រាប់និង Assist ៥ លើក តែចូលដល់រដូវកាលបន្ទាប់គេបានផ្ទេរចេញនៅលក្ខខណ្ឌខ្ចីជើងទៅចូលរួមជាមួយ Bayern Muncich ហើយលើកពាន Champions League នៅទីនោះ។ អ្វីដែលឈឺចាប់បំភ្លេចមិនបាន កីឡាករដែលក្លឹបចាយលុយអស់ច្រើនបំផុត ចុងក្រោយក៏ក្លាយជាកីឡាករស្ថិតក្នុងក្រុមគូប្រជែងដែលបំបាក់ខ្លួនក្នុងលទ្ធផល ៨-២ កាលពីរដូវកាលមុនផងដែរ។ ហាងឆេងថ្លៃខ្លួនរបស់ Coutinho នាពេលនេះចុះអស់ជាង ៨០ លានអឺរ៉ូ ធៀបនឹងការចុះហត្ថលេខានៅឆ្នាំ ២០១៨៕
ប្រភព៖ TransferMarkt