បុរសសាច់ដុំនិងត្រូវបានគេស្គាល់ថា ជាកីឡាករពោរពេញដោយល្បឿនគឺ Adama Traore ថ្មីៗនេះបានទម្លាយពីមូលហេតុច្បាស់ការ ដែលគេរមែងលាបប្រេងលើផ្នែកដៃមុនរៀងរាល់ការប្រកួត។
ខ្សែប្រយុទ្ធរបស់ក្រុមចចក Wolves បានសង្កត់ធ្ងន់ថា វាជាយុទ្ធសាស្ត្រដើម្បីជួយឲ្យគូប្រជែងមិនអាចយកដៃតាមប្រទាញផ្នែកសាច់ដុំដ៏ធំរបស់ខ្លួនបាន ហើយនៅពេលដែលគ្មានការរំខាន នោះល្បឿនរបស់គេក៏អាចរត់ទៅបានលឿនផងដែរ។
ប្រាប់សារព័ត៌មាន Daily Mail កីឡាករសញ្ជាតិអេស្ប៉ាញនិយាយ៖ “គ្រូពេទ្យនៅក្លឹបគាត់បានផ្តល់គំនិតហ្នឹង ព្រោះពួកគេដឹងថា ខ្ញុំមានបញ្ហានៅផ្នែកស្មារបស់ខ្ញុំ អ៊ីចឹងវាងាយស្រួលសម្រាប់គូប្រជែងនៅពេលដែលពួកគេចាប់ទាញដៃនិងស្មារបស់ខ្ញុំ ដើម្បីមិនឲ្យខ្ញុំអាចបម្លាស់ទី”។
លោកសង្កត់ធ្ងន់៖ “លុះដល់ពេលយើងប្រើប្រេងមកលាបលើផ្នែកទាំងនោះ វាពិតជាមិនអាចនោះទេដែលពួកគេអាចចាប់ទាញទៀតបាន ជាពិសេសពេលខ្ញុំកំពុងប្រើប្រាស់ល្បឿន ដោយនៅប្រកួតដំបូងខ្ញុំហាក់អស់សំណើចដែរ ព្រោះកីឡាករដែលធ្លាប់ចាប់ទាញខ្ញុំបាន ពួកគេឆ្ងល់ខ្លាំងណាស់ ថាម៉េចសុខៗបែរជាមិនអាចទាញបានទៅវិញ”។
បញ្ជាក់ថា នៅរដូវកាល ២០១៩/២០ កីឡាករវ័យ ២៤ ឆ្នាំ បង្ហាញខ្លួនឲ្យ Wolves បាន ៥៤ ប្រកួត រកបាន ៦ គ្រាប់និង Assist ១២ លើក។ បច្ចុប្បន្នហាងឆេងតម្លៃខ្លួនរបស់គេ ថ្លៃប្រមាណ ៤០ លានអឺរ៉ូ និងល្ហៀងៗថាមានក្លឹប Juventus/Man City និង Liverpool ធ្លាប់ចង់បាននៅរយៈពេលចុងក្រោយ៕ ប្រភព៖ Goal