កំពូលអ្នកវាយក្នុងទ្រុង Khabib Nurmagomedov បានប្រកាសចូលនិវត្តពីអាជីពរបស់ខ្លួន ក្នុងព្រឹត្តិការណ៍ UFC 254 កាលពីថ្ងៃទី ២៤ តុលា ឆ្នាំ ២០២០ កន្លងទៅ ដែលវាជាប្រកួតលើកចុងក្រោយរបស់លោក។
អត្តពលិកសញ្ជាតិរុស្ស៊ីបានរក្សាកំណត់ត្រាមិនស្គាល់ពាក្យថា “ចាញ់” នៅការប្រកួតផ្លូវការចំនួន ២៩ លើក។ ពីក្រោយមូលហេតុដែល Khabib សម្រេចបោះបង់អាជីព ដែលខ្លួនឆ្លងកាត់អស់រយៈពេលជាង ១០ ឆ្នាំមកនេះ ក៏ដោយសារតែការបាត់បង់ឪពុករបស់ខ្លួន ដែលទទួលមរណភាពកាលពីខែកក្កដា ដោយសាររោគាពាធ លាយឡំនឹងការឆ្លងជំងឺ COVID-19។
បុរសវ័យ ៣២ ឆ្នាំបានសន្យាជាមួយម្តាយរបស់ខ្លួនថា គេនឹងមិនឡើងការប្រកួតទៀតនោះទេ ប្រសិនណាលែងមានវត្តមានឪពុក ហើយប្រកួតនៅឆ្នាំ ២០២០ នេះ គេក៏បានប្រាប់ទៅម្តាយរួចហើយដែរ ថាវាគឺជាប្រកួតលើកចុងក្រោយ។
ក្រឡេកទៅមើលអ្នកគាំទ្រពិសេសនិងជាមិត្តភ័ក្ដិជិតស្និទ្ធរបស់ Khabib មួយរូប ដែលជាតារាឆ្នើមក្នុងពិភពបាល់ទាត់គឺ Cristinao Ronaldo ក៏បាននិយាយមុនការប្រកួតតាមរយៈការជជែកលើបណ្តាញសង្គមថា Khabib គេនឹងទទួលបានជ័យជម្នះ។ ដោយឡែកក្រោយចប់ការប្រកួត CR7 ក៏បានផ្ញើសារលើកទឹកចិត្តសម្រាប់ជ័យជម្នះចុងក្រោយរបស់ Khabib បន្ថែមទៀតថា៖ “អបអរសាទរប្អូនប្រុស! ឪពុករបស់ឯងប្រាកដជានឹងមានមោទនភាពជាមួយឯងខ្លាំងណាស់”។
គួរបញ្ជាក់ថា អត្តពលិកមានឈ្មោះបោះសំឡេងទាំងពីររូបខាងលើ សុទ្ធសឹងជាបុគ្គលដែលកំព្រាឪពុកដូចគ្នា។ ដោយសម្រាប់កីឡាករបាល់ទាត់ Cristiano Ronaldo ក៏ធ្លាប់បង្ហាញអារម្មណ៍សោកសង្រេងជាសាធារណៈ ម្តងទៅពីរលើករួចហើយដែរជុំវិញការបាត់បង់ដ៏ធំធេងមួយនេះ៕