លោក Zidane បានអះអាងថាខ្សែការពារ Sergio Ramos ជាសះស្បើយពីរបួស១០០% នឹងអាចចូលលេងបានទល់ក្រុម FC Barcelona នៅរាត្រីនេះ។ក្រុម Real Madrid ដែលកំពុងធ្លាក់ទម្រង់លេងនឹងត្រូវប្រកួតទល់ក្រុម Barcelona នៅម៉ោង៩យប់នេះ នៃពានរង្វាន់ La Liga ។
ជំនួបនេះទំនងជាពិបាកខ្លាំងសម្រាប់ក្រុម Real Madrid ព្រោះពួកគេកំពុងធ្លាក់ទម្រង់លេង ជាពិសេសប្រធានក្រុម Ramos បានរងរបួសផង។ តែបើតាមលោក Zidane បញ្ជាក់នៅម្សិលមិញនេះ គឺ Ramos ជាសះស្បើយទាន់ពេលវេលាហើយ។ រូបគេនឹងមានវត្តមានក្នុងជំនួប El Clasico នៅរាត្រីនេះ។
អ្នកចាត់ការ Zidane និយាយថា៖ “Sergio ជាអ្នកដឹកនាំរបស់យើង ជាប្រធានក្រុមរបស់យើង ប៉ុន្តែយើងមិនប្រថុយឡើយក្នុងការដាក់រូបគេឱ្យចូលលេងកាលពីប្រកួតកន្លងទៅ។ រូបគេនឹងនៅជាមួយយើងសម្រាប់ប្រកួតសំខាន់នៅរាត្រីនេះ”៕
ប្រភព៖ Marca