កាលពីថ្ងៃទី ២២ តុលា ឆ្នាំ ២០២០ កន្លងទៅនេះ ការតេស្តលើកទី ២ របស់ Cristiano Ronaldo នៅតែចេញលទ្ធផលវិជ្ជមាន មានផ្ទុកជំងឺ COVID-19។ ជុំវិញរឿងរ៉ាវនេះ ក៏មានការព្រួយបារម្ភជាខ្លាំងពីសំណាក់អ្នកគាំទ្រ ស្របពេលដែលការប្រកួតរវាង Juventus និង Barcelona នៅ UCL វគ្គចែកពូលត្រូវឈានចូលមកដល់នាសប្ដាហ៍បន្ទាប់។
ជាទូទៅតាមច្បាប់កំណត់របស់ UEFA គឺបណ្តាក្លឹបដែលចូលរួមទាំងអស់ ត្រូវបញ្ជូនបញ្ជីឈ្មោះកីឡាករមកកាន់សមាគមមុនរយៈពេល ១ សប្តាហ៍នៃការប្រកួត បែបនេះមានន័យថា ក្លឹប Juventus ត្រូវផ្ញើទៅ នៅថ្ងៃម្សិលមិញ។
យ៉ាងណាមិញឈ្មោះរបស់ CR7 នៅតែអាចបញ្ជូនទៅក្នុងបញ្ជីកីឡាករត្រូវចូលរួមការប្រកួតដដែល នោះក៏ដោយសារតែស្ថានភាពជំងឺ COVID-19 របស់លោក ពុំឃើញមានបង្ហាញរោគសញ្ញា ហើយសភាពរាងកាយក៏មិនចុះទ្រុឌទ្រោមអ្វីថែមទៀត។
ករណីពិសេសនេះ ដោយសារ Juventus បានផ្ញើឯកសារតាមដានសុខភាពរបស់ Ronaldo ឲ្យទៅ UEFA ធ្វើការត្រួតពិនិត្យ ហើយពួកគេបានបានភ្លើងខៀវ ប៉ុន្តែលុះត្រាណាតែមុនរយៈពេល ២៤ ម៉ោងនៃការប្រកួតមកដល់ ពោលគឺនៅថ្ងៃទី ២៨ តុលា កីឡាករព័រទុយហ្គាល់តេស្តឃើញលទ្ធផល អវិជ្ជមាន ជាសះស្បើយពីជំងឺ COVID-19 ទើបលោកអាចមានសិទ្ធចូលរួមការប្រកួតនោះបាន។ នេះបើតាមរបាយការណ៍ពី Sky Sports Italia បានចុះផ្សាយ។
សរុបមកមានន័យថា ឱកាសនៃការជួបគ្នារវាង M10 និង CR7 ដែលខកខានរយៈពេលជាង ២ ឆ្នាំមកហើយនោះ នៅតែមានភាគរយអាចកើតឡើងសម្រាប់ចុងខែតុលាខាងមុខនេះដដែល៕
ប្រភព៖ SkySports