កាលពីយប់មិញ គឺជាការប្រកួតក្នុងដីសម្រាប់ជំនួបបើកឆាកជុំទី ១ UCL លើកទី ១២ ហើយសម្រាប់ក្លឹប Real Madrid ប៉ុន្តែវាជាលើកដំបូងដែលក្លឹបទទួលបានបរាជ័យ ក្រោមលទ្ធផល ២-៣ ដោយថ្វីជើងរបស់ Shaktar Donetsk។
ទន្ទឹមនឹងអវត្តមានរបស់ Sergio Ramos រាប់ថាជាហេតុផលចម្បងដែល Real ភ្លាត់ចាញ់ក្រុមភ្ញៀវមួយនេះ ហើយវាក៏ជាប្រវត្តិសាស្រ្តផងដែរសម្រាប់ក្លឹប ព្រោះមុនៗមកមិនដែលចាញ់ក្នុងដីនៅពេលបើកឆាកបែបនេះទាល់តែសោះ។
បញ្ជាក់ថា ៧ ប្រកួតចុងក្រោយ ពេលដែលអត់ Ramos លេង គឺ Real ចាញ់ដល់ទៅ ៦ លើកឯណោះ នេះជាសញ្ញាបង្ហាញច្បាស់ថាពេលអវត្តមានខ្សែការពារលេងកាច គឺស្តេចសមិនងាយរកជ័យជម្នះបានឡើយ។ តួយ៉ាងដូចជាកាលចាញ់ CSKA ៣-០ ចាញ់ Ajax ៤-១ ចាញ់ PSG ៣-០ និងចាញ់ Man City- ២-១ ជាដើម លើកលែងតែមួយលើកពេលប៉ះ Club Brugge គឺបានឈ្នះ ៣-១៕
ប្រភព៖ BeSoccer