Mesut Ozil ជាកីឡាករកាន់ឆ្នាំមួយរូបរបស់ក្លឹបកាំភ្លើងធំ Arsenal ហើយនៅរយៈពេលចុងក្រោយនេះ ភាពរកាំរកូសរវាងគេនិងក្លឹបហាក់នៅតែបន្តមានឥតឈប់។
អ្នកគាំទ្រជាច្រើនបានទទូចអង្វរក្លឹប ឲ្យមេត្តាផ្តល់ឱកាសសម្រាប់ Ozil បន្តទៀត រហូតដល់អ្នកគាំទ្រខ្លះប្រកាសដាច់អហង្ការថានឹងបើកយុទ្ធនាការ Unfollow ក្លឹប Arsenal លើបណ្តាញសង្គមទៀតផង ប្រសិនណាមិនរកដំណោះស្រាយល្អមួយសម្រាប់កីឡាករអាល្លឺម៉ង់។
ពាក់ព័ន្ធនឹងរឿងរ៉ាវនេះ CTS Sports ក៏បង្វែរអារម្មណ៍អ្នកគាំទ្រ មករំឭកនូវទង្វើគួរឲ្យគោរព ៥ លើកដែលខ្សែបម្រើប្រយុទ្ធ Ozil ធ្លាប់បានធ្វើ៖
៥) ចំណាយដល់ការវះកាត់សម្រាប់ក្មេង ១ ០០០ នាក់
កាលពីពាក់កណ្តាលឆ្នាំ ២០១៩ Ozil និងភរិយាអ្នកស្រី Amine បានប្រកាសជុំវិញការជួយចេញថ្លៃចំណាយដល់ក្មេង ១ ០០០ នាក់ដែលមានការខ្វះខាតហើយត្រូវការការវះកាត់ណាមួយជាចាំបាច់។ គម្រោងនោះ Ozil សហការជាមួយក្រុមហ៊ុន BigShoe ដោយចង់ផ្តល់ជីវិតថ្មីឲ្យក្មេងដែលខ្វះខាតទាំងអស់ក្នុងលោក។
៤) ផ្ញើអាវជាប់ហត្ថលេខាទៅឲ្យក្មេងនៅប្រទេសកេនយ៉ា
នៅខែធ្នូ ឆ្នាំ ២០១៨ មានរូបភាពមួយសន្លឹកដែលគេចែកចាយលើបណ្តាញសង្គម ដោយបង្ហាញពីក្មេងឃ្វាលគោខ្វះខាតមួយរូប ដែលពាក់អាវកីឡាពណ៌ក្រហម ហើយសរសេរពាក្យ Ozil 10 ដោយដៃរបស់ខ្លួនឯង។
ក្រោយមើលឃើញពីទំហំចិត្តគាំទ្រ Ozil ក៏បានផ្ញើអាវ Arsenalអមហត្ថលេខារបស់ខ្លួនផ្ទាល់ ជាមួយនឹងសម្ភារៈកីឡាមួយចំនួនឲ្យទៅក្មេងខ្វះខាតចំនួន ២ រូបនៅប្រទេសកេនយ៉ានោះនាប៉ុន្មានខែបន្ទាប់។
៣) បរិច្ចាគលុយដែលឈ្នះនៅ World Cup ជួយក្មេងដែលមានជំងឺ
គ្រាដែលអាល្លឺម៉ង់ឈ្នះពាន World Cup ឆ្នាំ ២០១៤ រាល់កីឡាករទាំងអស់ទទួលបានប្រាក់លើកទឹកចិត្តជាង ៣១ មុឺនដុល្លារ ហើយពេលនោះ Ozil មិនយកដាក់ហោប៉ៅខ្លួនទេ ផ្ទុយទៅវិញបានបង្វែរទៅជួយដល់ក្មេងដែលកើតជំងឺនិងទាមទារការវះកាត់ចំនួន ២៣ រូបក្នុងប្រទេសប្រេស៊ីល។
២) បំពេញក្តីស្រមៃអ្នកគាំទ្រ
នៅខែកុម្ភៈឆ្នាំ ២០២០ Ozil បានអញ្ជើញអ្នកគាំទ្រអាយុ ១៧ ឆ្នាំម្នាក់ដែលមានជំងឺធ្ងន់ធ្ងរឲ្យមានឱកាសបានទស្សនាការប្រកួតខាងក្នុងប្រអប់កៅអី VIP នៅជំនួប Arsenal ទល់ Everton។ ក្រោយចប់ការប្រកួត Ozil ក៏បានមកជួបគេផ្ទាល់ និងឲ្យអាវមួយទៅគេផងដែរ។
ជាងនេះទៀតកាលប្រកួតមិត្តភាព ICC ឆ្នាំ ២០១៨ ក្នុងទីក្រុងរដ្ឋធានី Dublin ប្រទេសអៀរឡង់ Ozil ក៏បានបំពេញក្តីស្រមៃអ្នកគាំទ្រវ័យក្មេងមួយរូប ដែលបានលើកបាដាថាចង់បានអាវរបស់ Ozil។ គ្រានោះខ្សែបម្រើរបស់ Arsenal បានដោះអាវរត់យកទៅឲ្យអ្នកគាំទ្រវ័យក្មេងពោរពេញដោយស្នាមញញឹម។
១) Surprise ក្មេងតូចម្នាក់ដល់សាលារៀន
Look at this kid’s reaction when Mesut Ozil surprises him at school 👏👏
pic.twitter.com/hsC9MDA43p— talkSPORT (@talkSPORT) December 15, 2018
Kyan ជាអ្នកគាំទ្រដ៏តូចច្រឡឹងរបស់ Arsenal និងជាពិសេសគឺស្រលាញ់ Ozil ពេញបេះដូង ហើយនៅពេលមួយនោះកំឡុងពេលនៅសាលារៀន Ozil ក៏ស្រាប់តែរំលេចវត្តមានឈរពីក្រោយគេ ដែលបានបង្កការភ្ញាក់ផ្អើលដល់ Kyan ដល់ថ្នាក់គាំងនិយាយលែងចង់ចេញពេលបានជួប iDol នៅនឹងមុខពិតៗ៕
ប្រភព៖ GiveMeSport