នៅរដូវកាល ២០២០/២១ កីឡាករ Son Heung-Min បាននឹងកំពុងធ្វើព្យុះភ្លៀងជាខ្លាំង ដោយជាចំណែកជួយឲ្យក្លឹប Tottenham ទទួលបានលទ្ធផលល្អនៅក្របខ័ណ្ឌ Premier League។
Son ក៏កំពុងឈរជា Top Scorer រកបាន ៧ គ្រាប់ខ្ពស់ដាច់គេ ស្មើនឹងកីឡាករ Dominic Calvert-Lewin របស់ក្លឹប Everton។
ស្របពេលជាមួយគ្នានេះ CTS Sports ក៏សូមបង្វែរអារម្មណ៍អ្នកគាំទ្រឲ្យមកបានដឹងពីអាថ៌កំបាំងនិងការពិត ៤ យ៉ាង ដែលអ្នកគួរតែដឹងពីកីឡាករតំណាងឲ្យតំបន់អាស៊ី Son Heung-min៖
៤) មានឪពុកជាកីឡាករបាល់ទាត់
ឪពុករបស់ Son គឺជាអតីតកីឡាករបាល់ទាត់ចូលនិវត្ត មានឈ្មោះ Son Woong-jung។ បច្ចុប្បន្នលោកមានអាយុ ៥៨ ឆ្នាំ និងកំពុងបើកដំណើរការសាលាបាល់ទាត់ហ្វឹកហាត់ថ្នាលយុវជន ហើយកាលពីអតីតកាលលោកធ្លាប់ជាខ្សែប្រយុទ្ធលេងឲ្យក្លឹប Sangmu, Hyundai Horangi និង Ilhwa Chunman ស្ថិតក្នុងប្រទេសកំណើត។
៣) បោះបង់ការសិក្សាត្រឹមអាយុ ១៦ ឆ្នាំ
Son មិនមែនជាបុគ្គលដែលទទួលបានការសិក្សាខ្ពង់ខ្ពស់ដល់បញ្ចប់ថ្នាក់មហាវិទ្យាល័យអ្វីនោះទេ ដោយគេបានបោះបង់ការសិក្សាត្រឹមអាយុ ១៦ ឆ្នាំ គ្រានៅរៀនកម្រិតវិទ្យាល័យ ហើយបោះជំហានទៅចូលរួមក្នុងវិស័យកីឡាបាល់ទាត់ជាមួយថ្នាល Hamburg។ ប៉ុន្តែលទ្ធផលតបស្នងសម្រាប់ការខិតខំរបស់គេត្រលប់មកវិញ ដូចនៅពេលនេះ គឺរាប់ថាជោគជ័យកម្រិតខ្ពស់មួយហើយ។
២) និមិត្តរូបក្នុងដួងចិត្ត
កំឡុងពេលអភិវឌ្ឍខ្លួននៅថ្នាលយុវជន និមិត្តរូបរបស់ Son គឺជាកីឡាកររួមសញ្ជាតិកូរ៉េខាងត្បូង មានឈ្មោះ Lee Chung-yong ដែលគេមានអាយុបង Son តែ ៤ ឆ្នាំប៉ុណ្ណោះ។ មកទល់ពេលចុងក្រោយ iDol របស់កីឡាករ Spurs រូបនេះ ត្រូវបានគេដឹងថាជា Cristiano Ronaldo ដោយ Son ធ្លាប់បាននិយាយថា៖ “ខ្ញុំដឹងថាការនាមជាកីឡាករអាជីពមួយរូប គឺទាមទារទេពកោល្យខ្ពស់ តែដូចជា idol របស់ខ្ញុំ Cristiano Ronaldo គឺគាត់បានខិតខំខ្ពស់ជាងទេពកោសល្យដែលគាត់មានទៅទៀត បែបនេះកីឡាករទាំងអស់មិនគួរគិតថា មានទេពកោសល្យមួយមុខអាចគ្រប់គ្រាន់នោះឡើយ”។
១) កំណត់ត្រាតម្លៃផ្ទេរនិងការរកគ្រាប់បាល់
Son បានក្លាយជាកីឡាករអាស៊ីមានតម្លៃផ្ទេរចេញខ្ពស់បំផុត ក្រោយសម្រេចការផ្ទេរចេញពីក្លឹប Bayer Leverkusen មកចូលរួមនៅ Tottenham នាខែសីហា ឆ្នាំ ២០១៥ ក្នុងតម្លៃខ្លួន ២២ លានផោន។
ចំពោះការរកគ្រាប់បាល់ កំណត់ត្រាធំបង្អស់នៅ Premier League គឺ Son ក្លាយជាកីឡាករអាស៊ីរកបានច្រើនគ្រាប់បំផុត ដោយបច្ចុប្បន្នមាន ៦០ គ្រាប់ យកឈ្នះអ្នកចាស់គឺ Park Ji-Sung ធ្វើបាន ១៩ គ្រាប់៕ ប្រភព៖ Shoot.co.uk