កុងត្រារបស់ Lionel Messi ជាមួយក្លឹប Barcelona នឹងត្រូវផុតសុពលភាពត្រឹមខែមិថុនា ឆ្នាំ ២០២១ ប៉ុន្តែត្រឹមខែមករាខាងមុខនេះ ប្រសិនសាមីខ្លួនមិនមានការបន្តកុងត្រាថ្មី នោះគេអាចចរចាលក្ខណៈ Pre-Contract ជាមួយក្លឹបដទៃបានហើយ។
ពាក់ព័ន្ធនឹងរឿងនៃការគ្រោងចាកចេញរបស់កីឡាករអាហ្សង់ទីន បើតាមប្រភពពី Marca បានចុះផ្សាយថា ក្លឹបយក្សអេស្ប៉ាញក៏ត្រៀមលុយធំលើការយកអ្នកថ្មីមកជំនួសហើយដែរ ហើយម្នាក់នោះគឺជា Kylian Mbappe ដែលជាយុវជនឆ្នើមរបស់ក្លឹបបារាំង Paris Saint-Germain។
ប្រភពបានសង្កត់ធ្ងន់ថា កីឡាករបារាំងហាក់គ្មានចិត្តចង់បន្តកុងត្រាថ្មីជាមួយ PSG លើសពីឆ្នាំ ២០២២ ទាល់តែសោះ ដែលនេះញាំងឲ្យក្លឹបអាចនឹងបង្ខំចិត្តត្រូវលក់គេចេញត្រឹមឆ្នាំក្រោយ ហើយចំពោះតម្លៃខ្លួនអាចជាខ្ទង់ ៩១ លានផោន។
ការចរចានេះ Barcelona នឹងត្រូវចូលប្រជែងជាមួយបណ្តាក្លឹបយក្សធំៗនៅអឺរ៉ុប មានដូចជា Real Madrid, Liverpool និង Juventus ដែលសុទ្ធសឹងតែធ្លាប់ស្ថិតក្នុងចចាមអារ៉ាមចង់បានយុវជនបារាំងរូបនេះដូចៗគ្នា។ បញ្ជាក់ថា Mbappe រកបាន ៩៤ គ្រាប់និង Assist ៥៥ លើកហើយនៅការបង្ហាញខ្លួន ១២៨ ប្រកួតសរុបឲ្យ PSG៕ ប្រភព៖ Sportsmole