ក្លឹប Everton ត្រូវបានគេរាយការណ៍ថាបានយល់ព្រមតម្លៃខ្លួន២៨,៤លានផោន ទិញយកខ្សែការពារ Yerry Mina ពីក្រុមអ្នកមានបុណ្យ FC Barcelona ហើយ។
Mina កាលពីប៉ុន្មានថ្ងៃមុននេះ មានគេចុះផ្សាយច្រើនថារូបគេអាចនឹងទៅលេងនៅ Manchester United ដែលកំពុងតែស្វែងរកខ្សែការពារ។ យ៉ាងណាមិញ កីឡាករជម្រើសជាតិកូឡុំប៊ីរូបនេះបែរជាជ្រើសរើសទៅលេងឱ្យក្លឹប Everton វិញ ដែលជាក្លឹបមួយកំពុងទិញយកកីឡាករច្រើននារដូវកាលនេះ ដើម្បីមកពង្រឹងក្រុម។ វត្តមានរបស់ Mina គឺជាកីឡាករទី៤ហើយដែលក្លឹបនៅ Goodison Park ទិញចូល។
Mina ផ្លាស់ទៅលេងនៅ Barcelona នៅខែមករាដើមឆ្នាំនេះ ប៉ុន្តែមិនអាចលេងឱ្យជាប់ចិត្តគ្រូបង្វឹកបានឡើយ ដោយបង្ហាញខ្លួនត្រឹមតែ៦ប្រកួតប៉ុណ្ណោះ។ កីឡាករវ័យ២៣ឆ្នាំរូបនេះ បង្ហាញសមត្ថភាពលេងល្អនៅពានរង្វាន់ World Cup ជាមួយជម្រើសជាតិកូឡុំប៊ី។ ការនាំចូលខ្សែការពាររូបនេះ នឹងធ្វើឱ្យក្រុមរបស់លោក Marco Silva នឹងរឹងម៉ាំបន្ថែមទៀតនៅតំបន់ការពារ ដែលពួកគេនឹងបើកឆាកលីគកំពូលប៉ះជាមួយក្រុមចំណូលថ្មី Wolverhampton Wanderers នៅចុងសប្ដាហ៍នេះ៕ប្រភព៖ DailyMail