“Muay Thai Boy” Zhang Chenglong តែងតែដាក់គោលដៅបង្ហាញដល់ពិភពលោកអំពីកម្លាំងស្មារតីជាអ្នកលេងក្បាច់គុនមកពីចិន និងធ្វើឲ្យជាតិរបស់ខ្លួនមានមោទនភាព។
កីឡាករដែលជាគូប្រជែងឃីកបុកសីងលំដាប់ទី៣នៃទម្ងន់ bantamweight ទទួលបានឱកាសតតាំងនឹងជើងខ្លាំងជប៉ុន Hiroki Akimoto ក្នុងនាមជាគូឯកនៃព្រឹត្តិការណ៍ ONE: REIGN OF DYNASTIES II នៅប្រទេសសិង្ហបុរីនាយប់ថ្ងៃសុក្រទី ១៦ តុលា ខាងមុខនេះ។
កីឡាករវ័យ ២២ ឆ្នាំនឹងតេស្តសមត្ថភាពដ៏លំបាកមួយទល់នឹង Akimoto ដែលជាម្ចាស់ជើងឯកWFKO Karate World Champion និង កាន់កំណត់ត្រាប្រកួតល្អបំផុតពោលឈ្នះ ២១ ដង និង ចាញ់ ១ ដងក្នុងអាជីពក្បាច់គុនឃីកបុកសីង។ ដូច្នេះ កីឡាកររហស្សនាម “Muay Thai Boy” នឹងធ្វើការងារខ្លាំងបន្ថែមទៀត ដើម្បីឲ្យការប្រកួតឃីកបុកសីងមានភាពខុសប្លែកនៅ ONE Super Series ទម្ងន់ bantamweight។
Zhang បានឲ្យដឹងថា ៖«ទី១ កម្លាំងកាយសម្បទាត្រូវតែខ្លាំង ព្រោះវាសំខាន់ខ្លាំងណាស់នៅរៀងរាល់ការប្រកួត។ ត្រូវគិតថាធ្វើយ៉ាងណាដើម្បីឈ្នះ។ អ្នកត្រូវមានកាយសម្បទារឹងមាំ។ ចំណុចទី២ គឺ មានការគិតឆ្លាតវៃលើការប្រកួត»។
ការផ្គុំចូលគ្នាពីរចំណុចសំខាន់ខាងលើនាំឲ្យ “Muay Thai Boy” ឈ្នះ ៣ លើកជាប់គ្នានៅសង្វៀនសម្បូរដោយកីឡាករលំដាប់ពិភពលោកមួយនេះ។
ក្នុងការប្រកួតទី១ កីឡាករចិនបានយកឈ្នះអ្នកគុនខ្មែរ គង់ សំបូរ ដោយពិន្ទុមិនឯកច្ឆន្ទ នៅកម្មវិធីONE: CALL TO GREATNESS កាលកុម្ភៈ ឆ្នាំ ២០១៩។ ជ័យជម្នះនោះតាមរយៈក្បាច់ប្រដាល់ ពីចម្ងាយ និង ការប្រើស្នៀតខាវស្ដាំ អមដោយកណ្ដាប់ដៃឆ្វេងត្រង់ៗ។
ក្នុងរយៈពេល ៣ ខែបន្ទាប់ ជើងខ្លាំងវ័យ ២២ ឆ្នាំយកឈ្នះ Panicos Yusuf ដោយពិន្ទុជាឯកច្ឆន្ទនៅកម្មវិធី ONE: WARRIORS OF LIGHT។ កីឡាករសញ្ជាតិស៊ីបពិតជាប្រកួតប្រជែងខ្លាំងនៅពីរទឹកដំបូង ទោះបី Zhang បានធ្វើឲ្យរូបគេដួលពីរលើកដោយកណ្ដាប់ដៃខ្លាំងៗក៏ដោយ។ នៅទឹកចុងក្រោយ Zhang ទទួលជ័យជម្នះដោយពិន្ទុជាឯកច្ឆន្ទពីសំណាក់ចៅក្រមទាំងបី។
បន្ទាប់មកទៀត កីឡាករមានដើមកំណើតមកពី Shenzhen កាន់តែធ្វើឲ្យទទួលការចាប់អារម្មណ៍មិនស្ទើរនៅកម្មវិធី ONE: LEGENDARY QUEST កាល មិថុនា ឆ្នាំ ២០១៩ ជាកន្លែងដែលរូបគេផ្ដួល Tyler Hardcastle ឲ្យសន្លប់ដោយប្រើកណ្ដាប់ដៃស្ដាំ។ នេះជាការផ្ដួលកីឡាករអូស្ត្រាលីត្រឹម រយៈពេល ២ នាទីដំបូងប៉ុណ្ណោះ។ យ៉ាងណាក្ដីបន្ទាប់ពីឈ្នះ ៣-០ ពេលចាប់ផ្ដើមដំបូងនៅ ONE Super Series អ្នកជំនាញឃីកបុកសីង Zhang ឡើងប្រកួតនៅកម្មវិធី ONE: MARK OF GREATNESS កាលខែធ្នូ។ Zhang ចាញ់ពិន្ទុជាឯកច្ឆន្ទលើ Alaverdi “Babyface Killer” Ramazanov ដែលគ្រងខ្សែក្រវាត់ឃីកបុកសីងពិភពលោក ONE Bantamweight បានសម្រេច។
ឥឡូវនេះកីឡាករមកពីក្លិប Shengli Fight Club នឹងត្រលប់មកវិញក្នុងបំណងផ្ដួល Akimoto ដែលបានឈ្នះកីឡាករមួយចំនួនដូចជា Kenny “The Pitbull” Tse និង Josh “Timebomb” Tonna និង ទើបឡើងប្រជែងខ្សែក្រវាត់ ONE Strawweight ថ្មីៗនេះ។
ទោះយ៉ាងណា Zhang កំពុងស្វែងរកឱកាសដើម្បីឡើងជួប Ramazanov សាជាថ្មី។ កីឡាករមានស្រុកកំណើតនៅ Shenzhen រំពឹងបានទទួលលទ្ធផលល្អពេលប្រកួតតំណាងឲ្យប្រទេសរបស់ខ្លួន និង ប្រកួតឲ្យល្អបំផុត។
Zhang គូសបញ្ជាក់បែបនេះ ៖«ខ្ញុំចង់បង្ហាញឲ្យពិភពលោកបានដឹងអំពីសារសំខាន់នៃក្បាច់គុនចិននិង បង្ហាញអំពីកម្លាំងស្មារតីរបស់កីឡាករចិន។ កម្លាំងស្មារតី ធ្វើឲ្យយើងឆ្ពោះទៅមុខជានិច្ច»។
វាជាកម្លាំងចិត្តមួយសម្រាប់ Zhang ដែលមិនចង់ឲ្យឈានដល់ការដាក់ពិន្ទុកាត់សេចក្ដីនោះទេ។ Zhang បានសង្កត់ធ្ងន់ថា ៖«ខ្ញុំជឿជាក់ថាអាចផ្ដួលដៃគូរបស់ខ្ញុំឲ្យសន្លប់បាន។ មួយវិញទៀតខ្ញុំសង្ឃឹមយ៉ាងមុតមាំដោយអាចផ្ដួលឲ្យលឿនតាមតែអាចធ្វើទៅបាន»។