ស្ថាប័ន ONE Championship បានប្រកាសជាផ្លូវការហើយនូវសមាសភាពគូប្រកួតក្នុងព្រឹត្តិការណ៍ ONE: INSIDE THE MATRIX ក្នុងនោះនារីជើងខ្លាំងគុនចម្រុះលេខ១កម្ពុជា នៅ ស្រីពៅ ត្រូវប៉ះនារីជើងខ្លាំងគុនចម្រុះលេខ១ឥណ្ឌា Ritu Phogat។
ONE Championship បានប្រកាសព្រឹត្តិការណ៍ ONE: INSIDE THE MATRIX ដែលនឹងផ្សាយផ្ទាល់ចេញពីកីឡដ្ឋាន Singapore Indoor Stadium នៅថ្ងៃទី៣០ ខែតុលា ខាងមុខនេះនៅប្រទេសសិង្ហបុរី។
ព្រឹត្តិការណ៍ប្រកួតនេះនឹងក្លាយជាការប្រកួតដ៏ធំបំផុតប្រចាំឆ្នាំ២០២០ដែលនឹងប្រព្រឹត្តទៅនៅប្រទេសសិង្ហបុរី ខណៈគូឯកប្រចាំព្រឹត្តិការណ៍សុទ្ធតែជើងឯកពិភពលោកដែលត្រូវឡើងការពារខ្សែក្រវាត់ពិភពលោករបស់ខ្លួន។
ដំណឹងនេះបានកើតមានឡើង បន្ទាប់ពីព្រឹត្តិការណ៍ប្រកួត ONE: REIGN OF DYNASTIES កាលពីថ្ងៃសទី៩ ខែតុលាកន្លងទៅថ្មីៗនេះទទួលបានជោគជ័យ។ ព្រឹត្តិការណ៍ប្រកួតផ្សាយផ្ទាល់នោះបានក្លាយជាព្រឹត្តិការណ៍កីឡាអន្តរជាតិលើកទី១នៅប្រទេសសិង្ហបុរីចាប់តាំងពីជំងឺ COVID-19 បានផ្ទុះឡើងកាលពីដើមឆ្នាំ។
អ្វីដែលរឹតតែអស្ចារ្យបំផុតនោះគឺការប្រកួតដណ្តើមខ្សែក្រវាត់ពិភពលោករហូតដល់៤គូដែលធ្លាប់ត្រូវបានបញ្ជាក់កន្លងមកសម្រាប់ ONE: INSIDE THE MATRIX ហើយឥឡូវនេះគូប្រកួតទាំងអស់ត្រូវបានប្រកាសទាំងអស់ជាផ្លូវការហើយ។
វីរបុរស និងជាអតីតជើងឯកគុនចម្រុះពិភពលោក ONE Lightweight World Champion របស់ប្រទេសហ្វីលីពីនគឺ Eduard “Landslide” Folayang ត្រូវតទល់នឹងជើងខ្លាំងកីឡាករអូស្ត្រាលី Antonio “The Spartan” Caruso។
ជាពិសេសទៀតនោះកីឡាការិនីគុនចម្រុះលេខ១ឥណ្ឌា Ritu “The Indian Tigress” Phogat ដែលមានជំនាញចំបាប់បានវិលត្រឡប់មកកាន់សង្វៀនវិញដោយត្រូវជួបជើងឯកគុនខ្មែរអន្តរជាតិ និងអ្នកលេងគុនចម្រុះលេខ១កម្ពុជា នៅ ស្រីពៅ៕
គូប្រកួតទាំងអស់ ONE: INSIDE THE MATRIX
- (ជើងឯកពិភពលោក) Aung La N Sang vs. Reinier De Ridder (ខ្សែក្រវាត់ ONE Middleweight)
- (ជើងឯកពិភពលោក) Christian Lee vs. Iuri Lapicus (ខ្សែក្រវាត់ ONE Lightweight)
- (ជើងឯកពិភពលោក) Martin Nguyen vs. Thanh Le (ខ្សែក្រវាត់ ONE Featherweight)
- (ជើងឯកពិភពលោក) Xiong Jing Nan vs. Tiffany Teo (ខ្សែក្រវាត់ ONE Women’s Strawweight)
- ជើងខ្លាំង Eduard Folayang vs. Antonio Caruso (គុនចម្រុះទម្ងន់ – lightweight)
- កីឡាការិនី Ritu Phogat vs. នៅ ស្រីពៅ (គុនចម្រុះទម្ងន់ – atomweight)