នៅថ្ងៃពុធនេះ ក្រុមជម្រើសជាតិអាហ្សង់ទីនមានភារកិច្ចនឹងត្រូវតតាំងទល់ក្រុមជម្រើសជាតិបូលីវី សម្រាប់វគ្គជម្រុះដើម្បីដណ្តើមយកកៅអីលេងនៅព្រឹត្តិការណ៍ FIFA World Cup ឆ្នាំ ២០២២។
ប៉ុន្តែក្រុមអាហ្សង់ទីននឹងត្រូវខកខានការចូលរួមពីសំណាក់កីឡាករសំខាន់នៅតំណែងប្រយុទ្ធនោះគឺ Paulo Dybala។ តាមពិតទៅគេខកខានតាំងពីប្រកួតមុនពេលប៉ះអេក្វាឌ័រមកម្ល៉េះ ហើយហេតុផលដោយសារមានបញ្ហាត្រង់ផ្នែកក្រពះ និងបច្ចុប្បន្នកំពុងសម្រាកព្យាបាលនៅប្រទេសកំណើតផ្ទាល់តែម្តង។
តាមការបញ្ជាក់ពីគណនីផ្លូវការរបស់ក្រុមជម្រើសជាតិអាហ្សង់ទីនបានសរសេរថា៖ “Paulo Dybala នឹងមិនធ្វើដំណើរជាមួយក្រុមទៅចូលរួមការប្រកួតទល់បូលីវីនោះទេ ដោយកាយសម្បទារបស់គាត់មិនអាចសម្របទៅបាន ហើយគាត់នឹងបន្តព្យាបាលជំងឺ ក្រោយពីមានបញ្ហាផ្នែកក្រពះថ្មីៗនេះ”។
យ៉ាងណាមិញសម្រាប់ការលេងឲ្យក្លឹប Juventus ដែលត្រូវវិលត្រលប់មកវិញនៅថ្ងៃទី ១៧ តុលាខាងមុខ ទំនងជាមិនអីនោះទេសម្រាប់ Dybala៕ ប្រភព៖ AF