ខ្សែបម្រើ Naby Keita បានឆ្លងមេរោគ Covid-19 និងក្លាយជាកីឡាករទី៤ក្នុងក្រុម Liverpool ដែលបានផ្ទុកមេរោគមួយនេះ។
ដំណឹងកីឡាករផ្ទុកមេរោគ Covid-19 កាន់តែច្រើននាក់នេះ បានធ្វើឱ្យក្រុម Liverpool បាត់បង់កម្លាំងសំខាន់បន្ថែមទៀតហើយ ត្បិតអីពួកគេមានភារកិច្ចការពារតំណែងជើងឯករដូវកាលនេះផង។ មួយវិញទៀត កីឡាករដែលបានឆ្លងមេរោគនេះ សុទ្ធតែជាកីឡាករសំខាន់ក្នុងក្រុមដូចជា Mane , Thiago Alcantara , Shaqiri ជាដើម។ ការឆ្លងដល់ទៅ៤នាក់នេះ ទំនងជាធ្វើឱ្យក្រុម Liverpool កាន់តែបារម្ភខ្លាំងឡើង ព្រោះខ្លាចមានកីឡាករដទៃទៀតឆ្លងមេរោគដែរ។
ដោយឡែក Liverpool បច្ចុប្បន្នមានកីឡាករជាច្រើនកំពុងចេញទៅលេងឱ្យក្រុមជម្រើសជាតិទៀត ហើយនឹងត្រលប់មករួមក្រុមវិញនៅពាក់កណ្ដាលសប្ដាហ៍នេះ។ ពួកគេក៏មានភារកិច្ចធំ ប៉ះក្រុមកំពុងឡើងជើង Everton នៅថ្ងៃទី១៧ទៀត។ ប្រសិនបើប៉ុន្មានថ្ងៃខាងមុខនេះ បន្ដរកឃើញកីឡាករឆ្លងមេរោគទៀត នោះពួកគេនឹងជួបផលលំបាកខ្លាំងហើយ៕
ប្រភព៖ DailyMail