អតីតកីឡាករឆ្នើមនៅ Premier League គឺកីឡាករ Robinho ថ្មីៗនេះបានព្រមព្រៀងចុះហត្ថលេខាវិលត្រលប់ទៅកាន់ក្លឹបចាស់ Santos ក្នុងប្រទេសប្រេស៊ីល ក្រោយពីផុតកុងត្រាជាមួយក្លឹប Istanbul Basaksehirនិងក្លាយជាកីឡាករឥតតម្លៃខ្លួនលើទីផ្សារដោះដូរ។
បុរសវ័យ ៣៦ ឆ្នាំ ដែលធ្លាប់ទទួលបានថ្លៃពលកម្ម ១៦០ ០០០ ផោន/សប្ដាហ៍ និងជាកីឡាករមានតម្លៃផ្ទេរថ្លៃបំផុតនៅ Premier League កាលពីឆ្នាំ ២០០៨ បានសម្រេចចិត្តទម្លាក់ចុងប៊ិចចុះហត្ថលេខាលើកុងត្រារយៈពេល ៥ ខែ ដែលមានសុពលភាពផុតកំណត់នៅចុងខែកុម្ភៈ ឆ្នាំ ២០២១។
ក្នុងកុងត្រានោះ គឺខ្សែប្រយុទ្ធប្រេស៊ីលទទួលបានថ្លៃពលកម្មតែជាង ៦៧ ដុល្លារ/សប្តាហ៍ ឬ ២៧០ ដុល្លារ/ខែតែប៉ុណ្ណោះ។ ប៉ុន្តែលោកអាចមានសិទ្ធទទួលបានប្រាក់ឧបត្ថម្ភបន្ថែមលើថ្លៃពលកម្ម ដល់ទៅជាង ៥០ ០០០ ដុល្លារ ក្រោយពីបង្ហាញខ្លួននៅឈុតធំចំនួន ១០ លើក។
ជុំវិញការចុះហត្ថលេខាថ្មី អតីតកីឡាករធ្លាប់លេងនៅក្លឹប Real Madrid, Man City និង AC Milan រូបនេះនិយាយថា៖ “ក្លឹប Santos តែងតែជាផ្ទះរបស់ខ្ញុំ ហើយខ្ញុំមានគោលដៅចង់ជួយក្លឹបនេះទាំងក្នុងនិងក្រៅទីលាន ព្រោះខ្ញុំទទួលបានការអភិវឌ្ឍខ្លួននៅទីនេះ ហើយក្តីស្រមៃចង់ក្លាយជាកីឡាករបាល់ទាត់ ក៏ក្លឹប Santos FC ជាអ្នកជួយឲ្យខ្ញុំសម្រេចបានដែរ”។
បញ្ជាក់ថា កំឡុងការចាយពេលក្នុងអាជីពបាល់ទាត់ ១៧ ឆ្នាំមកនេះ Robinho រកបាន ១៤៦ គ្រាប់និង Assist ៩០ លើកនៅការបង្ហាញខ្លួន ៥៥២ ប្រកួត៕ ប្រភព៖ TheSun