Cristiano Ronaldo នាពេលបច្ចុប្បន្ននេះ ត្រូវបានគេដឹងថាជាកីឡាករដែលស៊ីថ្លៃពលកម្មខ្ពស់ដាច់គេប្រចាំក្របខ័ណ្ឌអ៊ីតាលី Serie A ដោយមួយរដូវកាលទទួលបាន ៣១ លានអឺរ៉ូ។
បើតាមរបាយការណ៍ពី La Gazzetta dello Sport បានចុះផ្សាយ ប្រាក់ពលកម្មរបស់កីឡាករព័រទុយហ្គាល់ គឺខ្ពស់ជាងបណ្តាក្លឹបចំនួន ៣ នៅ Serie A ទៅទៀត ក្នុងនោះមានដូចជាក្លឹប Spezia ចាយអស់ ២២ លានអឺរ៉ូ ខណៈ Crotone ចាយអស់ ២៣ លានអឺរ៉ូ និង Verona ចាយអស់ ២៤ លានអឺរ៉ូ ហើយក្លឹប Udinese គឺអស់ ៣១ លានអឺរ៉ូ ស្មើនឹងប្រាក់ពលកម្មរបស់ Ronaldo ម្នាក់។
ដោយឡែកសម្រាប់ក្លឹប Juventus ទាំងមូលវិញ គឺមួយរដូវកាលក្លឹបចំណាយអស់ ២៣៦ លានអឺរ៉ូ ហើយ Inter Milan ឈរលេខបន្ទាប់ចាយអស់ ១៤៩ លានអឺរ៉ូ Roma អស់ ១១២ ឡនាអឺរ៉ូ និង Napoli អស់ ១០៥ លានអឺរ៉ូ។
បញ្ជាក់ថា ការប្រកួតប្រជែងនៅក្របខ័ណ្ឌ Serie A រដូវកាល ២០២០/២១ ហើយមានការប្រកៀកប្រកិតខ្លាំង ដោយត្រឹម ៣ ជុំដំបូង ក្រុម Atalanta និង AC Milan មិនទាន់ស្គាល់ពាក្យថាចាញ់នៅឡើយ ដោយមាន ៩ ពិន្ទុពេញ ហើយ Juventus ទើបលេងបាន ២ ប្រកួត ស្មើ ១ ឈ្នះ ១ ឈរលេខរៀងទី ៨ ឯណោះ៕ ប្រភព៖ BeSoccer