អ្នកគាំទ្រវិស័យបាល់ទាត់ប្រាកដជាធ្លាប់លឺឈ្មោះ Jorge Mendes ដែលជាភ្នាក់ងាររត់ការរបស់កីឡាករ Cristiano Ronaldo និងអ្នកចាត់ការ Jose Mourinho ក៏ដូចជាលោក Jonathan Barnett ដែលរមែងលេចឈ្មោះនៅក្នុងអត្ថបទព័ត៌មាន ដែលចេញមកធ្វើជាអ្នកតំណាងជំនួស Gareth Bale។
អ្នកទាំងនោះ គឺត្រូវបានគេស្គាល់ថាជា ភ្នាក់ងាររត់ការផ្ទាល់ខ្លួនឬ Agent ហើយក្នុងពិភពបាល់ទាត់ ពួកគេមានតួនាទីសំខាន់ណាស់ ជាពិសេសគឺនៅដើមនិងបញ្ចប់រដូវកាលនីមួយៗនៅលើទីផ្សារដោះដូរ។
តើអ្នកឆ្ងល់ទេថា ភ្នាក់ងាររត់ការទាំងនោះត្រូវទទួលបន្ទុកលើការងារអ្វីខ្លះសម្រាប់អតិថិជនដែលជាកីឡាកររបស់ពួកគេ ហើយអាចទទួលបានចំណូលដោយរបៀបណា?
តាមពិតទៅគឺលើសពីអ្វីដែលអ្នកធ្លាប់បានដឹង ដោយក្រៅពីចរចាលើកុងត្រានិងកិច្ចព្រមព្រៀងផ្ទេរចេញចូលរបស់កីឡាករ Agent ក៏មានតួនាទីក្នុងការចរចាជាមួយក្រុមហ៊ុនជាម្ចាស់ឧបត្ថម្ភនៅខាងក្រៅផ្សេងទៀត និងជាអ្នករៀបចំទាំងស្រុងនូវការបង្ហាញខ្លួនទាំងលើប៉ុស្តិ៍ទូរទស្សន៍ ឬនៅសន្និសីទសារព័ត៌មានណាមួយសម្រាប់កីឡាករ។
ដើម្បីក្លាយជាភ្នាក់ងាររត់ការម្នាក់ គឺពុំបានទាមទារការឆ្លងកាត់ប្រលងយកអាជ្ញាប័ណ្ណអ្វីពី UEFA នោះទេ ប៉ុន្តែត្រូវតែមានចំណេះដឹងធំទូលាយទៅលើផ្នែកច្បាប់ ជាពិសេសគឺច្បាប់នៃកិច្ចកុងត្រា និងចំណេះដឹងផ្សេងទៀតលើផ្នែកគ្រប់គ្រងអាជីវកម្ម។
និយាយដល់ចំណូលរបស់ពួកគេ សម្រាប់ភ្នាក់ងារធំៗក្នុងមួយឆ្នាំគឺកើបបានប្រាក់មិនក្រោមខ្ទង់លានដុល្លារឡើយ។ បើយើងលើកតែចំណុចនៃការចរចាកិច្ចព្រមព្រៀងរបស់កីឡាករ គឺពួកគេរមែងទទួលបានភាគលាភ ឬយើងហៅថា Commission ចំនួន ១០ ភាគរយឡើងទៅ ដោយជាមធ្យមនៅ Premier League រៀងរាល់ការចរចាកីឡាករម្នាក់ គឺទទួលបានចន្លោះពី ១ ២០០ ទៅ ៥៥០ ០០០ ផោន ខណៈនៅក្របខ័ណ្ឌ MLS របស់អាមេរិកទទួលបានចន្លោះពី ១ ៣០០ ទៅ ២៦០ ០០០ ដុល្លារ។ (បញ្ជាក់៖ មិនមានការកំណត់ថាភ្នាក់ងារម្នាក់អាចទទួលការងារពីកីឡាករឬអ្នកចាត់ការប៉ុន្មាននាក់ឡើយ)
ជាឧទាហរណ៍ជាក់ស្ដែងដូចជាលោក Jorge Mendes ដែលកាន់ការងារជាមួយកីឡាករច្រើនជាង ៨ រូប និងអ្នកចាត់ការ ១ រូប កំឡុងកាលពីឆ្នាំ ២០១៨ ពេល Real Madrid លក់ Cristiano Ronaldo ឲ្យទៅ Juventus កាលនោះលោកទទួលបានភាគលាភប្រមាណជាង ១៣ លានដុល្លារអាមេរិកឯណោះ៕
ប្រភព៖ AF