អ្នកគាំទ្រវិស័យកីឡាបាល់ទាត់ ជាពិសេសគឺអ្នកដែលរស់នៅក្នុងតំបន់អាស៊ីប្រាកដជាស្គាល់ច្បាស់នៅកីឡាករលេងនៅតំណែងប្រយុទ្ធ Son-Heung Min។ ចាប់តាំងពីការផ្ទេរចេញពី Bayer Leverkusen មកចូលរួមនៅ Tottenham នាឆ្នាំ ២០១៥ កីឡាករកូរ៉េខាងត្បូងបានវិវត្តខ្លួនទទួលបានជោគជ័យជាបន្តបន្ទាប់មកទល់សព្វថ្ងៃ។
នៅរដូវកាល ២០២០/២១ នេះ Son រកបានគ្រាប់បាល់ចំនួន ៦ គ្រាប់យ៉ាងឆាប់រហ័ស ដោយចាយពេលត្រឹម ៤ ប្រកួត រុញឲ្យឈ្មោះរបស់លោកកំពុងឈរចំណាត់ថ្នាក់កំពូល Top Scorer នៅ Premier League។
បង្វែរទៅរឿងរ៉ាវជីវិតពិតបន្តិច តើអ្នកដឹងទេថា Son មិនទាន់មានដៃគូស្នេហាច្បាស់លាស់នៅឡើយ និងមួយផ្សេងទៀតពីមូលហេតុដែល Son ដាក់គោលដៅមិនយកប្រពន្ធរហូតដល់ចូលនិវត្តពីបាល់ទាត់?
កីឡាករពាក់អាវលេខ ៧ របស់មាន់ខ្នាយមាសធ្លាប់បាននិយាយថា៖ “ឪពុករបស់ខ្ញុំបាននិយាយអំពីរឿងហ្នឹង ហើយខ្ញុំក៏យល់ស្របដូចគាត់អ៊ីចឹងដែរ ព្រោះជាធម្មតាពេលអ្នករៀបការ គឺគ្រួសារហ្នឹងហើយសំខាន់បំផុត បន្ទាប់មកទើបយើងគិតដល់បាល់ទាត់ បែបនេះខ្ញុំចង់ប្រាកដថា ខ្ញុំអាចចាប់យកពេលវេលានេះខិតខំប្រឹងប្រែងឲ្យឈានដល់ចំណុចកំពូលមួយសិន ពោលគឺមើលឃើញ បាល់ទាត់ស្ថិតនៅលេខ ១ ក្នុងបេះដូង”។
Son សង្កត់ធ្ងន់៖ “ហើយខ្ញុំក៏មិនដឹងច្បាស់ថាត្រូវការពេលយូរបែបណាដើម្បីឈានដល់ចំណុចកំពូលមួយដែរ តែត្រឹមដឹងថាពេលយើងមានអាយុ ៣៣ ឬ ៣៤ ឆ្នាំ ឬរហូតដល់ពេលយើងចូលនិវត្ត ក៏យើងនៅតែអាចមានគ្រួសារបានដែរ”៕
ប្រភព៖ SportBible