ចំណង់ចំណូលចិត្តនៃការគាំទ្រក្លឹបបាល់ទាត់ណាមួយៗ ក្នុងការគិតរបស់មនុស្សម្នាក់ៗគឺរមែងមានភាពខុសគ្នាទាំងស្រុង ខ្លះទៅជាអ្នកគាំទ្រក្លឹប Barcelona ខ្លះគាំទ្រក្លឹប Real Madrid ខ្លះជាអ្នកគាំទ្ររបស់ Man Utd អ្វីជាដើម។
សម្រាប់កីឡាករឯណោះវិញ បើស្ម័គ្រស្មោះគាំទ្រក្លឹបណាមួយតាំងពីដើមហើយ នៅថ្ងៃអនាគតពួកគេនឹងប្តូរផ្តាច់ចាប់យកឱកាសការចូលរួមលេងឲ្យក្លឹបនោះទាល់តែបាន។ ប៉ុន្តែចម្លែកអី សម្រាប់កីឡាករ ៤ រូបនេះវិញ ត្បិតបើបច្ចុប្បន្នកំពុងឈរជើងនៅក្លឹបរបស់ពួកគេ ប៉ុន្តែតាមរយៈការបង្ហើបប្រាប់ត្រង់ៗ កាលដើមឡើយពួកគេជាអ្នកគាំទ្រក្លឹបគូប្រជែងទេ។
៤) Gareth Bale ធ្លាប់គាំទ្រក្លឹប Arsenal
Bale បច្ចុប្បន្នកំពុងឈរជើងនៅក្លឹប Tottenham តែកាលពីអតីតកាល គេធ្លាប់និយាយថា៖ “ខ្ញុំចូលចិត្តមើលការលេងរបស់ Arsenal ខ្លាំងណាស់ ជាពិសេសគឺការលេងរបស់ Thierry Henry ដោយពួកគេជាក្រុមល្អមួយ សម្រាប់រឿងនេះប្រហែលអ្នកគាំទ្រ Tottenham មិនសប្បាយចិត្តទេ ការដែលខ្ញុំកាន់អាវរបស់ Henry”។
៣) Luka Modric ធ្លាប់គាំទ្រក្លឹប Barcelona
វាជារឿងដែលធ្លាយចេញពីមិត្តរួមជម្រើសជាតិរបស់ Modric នោះគឺ Ivan Rakitic ដោយកាលពីឆ្នាំ ២០១៨ ខ្សែបម្រើសញ្ជាតិក្រូអាតបាននិយាយថា៖ “ពេលយើងនៅក្មេង យើងរមែងមានក្រុមដែលយើងស្រលាញ់រៀងខ្លួន ហើយគ្មានអ្វីត្រូវលាក់បាំងទេសម្រាប់ Luka កាលនោះគាត់ស្រលាញ់ក្រុមដែលគ្រោងឈុតពណ៌ក្រហមលាយខៀវ (តំណាងឲ្យ Barcelona)”។
២) Raheem Sterling ធ្លាប់គាំទ្រក្លឹប Man Utd
ខ្សែប្រយុទ្ធរបស់ក្លឹប Man City ឯណេះវិញ ក៏ធ្លាប់និយាយដែរថា៖ “ខ្ញុំពិតជាមិនគួរនិយាយពាក្យនេះទេ ជាពិសេសគឺពេលឥឡូវនេះតែម្តង ដោយកាលពីនៅក្មេងខ្ញុំធ្លាប់ជាអ្នកគាំទ្រដ៏ងប់ងុលម្នាក់របស់ក្លឹប Man Utd ហើយខ្ញុំក៏ធ្លាប់មានអាវរបស់ United ពេលពួកគេឈ្នះ FA Cup ឆ្នាំ ២០០៧ ដែរ”។
១) Paul Pogba ធ្លាប់គាំទ្រក្លឹប Arsenal
នៅ Premier League កីឡាករបារាំងបានលេងឲ្យតែក្លឹប Man Utd មួយប៉ុណ្ណោះ តែជាក់ស្តែងការគាំទ្រនៅកុមារភាពគឺជាក្លឹបកាំភ្លើងធំឯណោះវិញ។ ខ្សែបម្រើ Pogba និយាយ៖ “ស្មោះត្រង់ទៅកាលពីដើមឡើយ ខ្ញុំជាអ្នកគាំទ្ររបស់ Arsenal ទេ ព្រោះអ្នកដឹងស្រាប់ហើយកាលនោះក្នុងក្រុម Arsenal សុទ្ធតែជាកីឡាករបារាំងភាគច្រើន”៕
ប្រភព៖ Sportskeeda