នៅឯក្នុងកីឡដ្ឋាន Anfield របស់ក្លឹបហង្សក្រហម Liverpool មុនកីឡាករដើរចូលទៅកាន់ទីលាន បើក្រឡេកមើលទៅខាងលើផ្នែកជញ្ជាំង អ្នកប្រាកដជាឃើញផ្លាកមួយសរសេរថា៖ “THIS IS ANFIELD” អមនិមិត្តសញ្ញានៃក្លឹប Liverpool។ ប៉ុន្តែអ្នកត្រូវដឹងថា ផ្លាកមួយនេះមិនមែនសុទ្ធតែកីឡាកររាល់គ្នាអាចដើរចេញចូលប៉ះបានស្រួលៗនោះទេ។
វាជាវិន័យដ៏តឹងតែងមួយ ដែលលោក Jurgen Klopp ចាប់ផ្ដើមសម្រេចដាក់ឲ្យដំណើរការ ចាប់តាំងពីថ្ងៃទី ៨ តុលា ឆ្នាំ ២០១៥ ពេលចូលមកដឹកនាំ Liverpool ដោយកំណត់ថារាល់កីឡាករទាំងអស់មិនអនុញ្ញាតឲ្យប៉ះផ្លាក “This Is Anfield” បានឡើយ។
ហេតុផលគឺអ្នកចាត់ការសញ្ជាតិអាល្លឺម៉ង់ ចង់បំផុសទឹកចិត្តឲ្យកីឡាករមានការខិតខំប្រឹងប្រែង ព្រោះផ្លាកនោះអាចអនុញ្ញាតឲ្យនរណាម្នាក់ប៉ះបាន លុះត្រាតែពួកគេជួយឲ្យក្រុមទទួលបានភាពជោគជ័យជាដុំកំភួនមួយសិន។ ជាឧទាហរណ៍ដូចនៅឆ្នាំ ២០១៩ សមាជិកក្រុមដឹកនាំដោយលោក Jurgen Klopp បានធ្វើព្យុះភ្លៀងផ្តួលក្រុមខ្លាំងៗយកឈ្នះពានរង្វាន់អឺរ៉ុប UEFA Champions League បែបនេះទើបពួកគេអាចប៉ះផ្លាកនោះបាន។
ច្បាប់ក្រមនេះបានដំណើរមកទល់ពេលបច្ចុប្បន្ន ហើយសូម្បីតែ Thiago Alcantara ដែលជាកីឡាករជួយឲ្យ Bayern ឈ្នះពាន UCL ឆ្នាំ ២០២០ និងទើបផ្ទេរមកចូលរួមនៅ Liverpool ក៏មិនទាន់ហ៊ានថតរូបយកដៃទៅប៉ះផ្លាកនោះដែរ៕
ប្រភព៖ Mirror