Lionel Messi ក្រៅពីជួយឲ្យក្លឹប Barcelona ទទួលបានជោគជ័យរយៈពេលច្រើនឆ្នាំ លោកក៏ចូលរួមចំណែកយ៉ាងសំខាន់ ក្នុងការជួយឲ្យក្រុមជម្រើសជាតិអាហ្សង់ទីនលេចមុខមាត់លើឆាកអន្តរជាតិផងដែរ។
ខ្សែប្រយុទ្ធវ័យ ៣៣ ឆ្នាំ ធ្លាប់ជួយឲ្យអាហ្សង់ទីនឡើងដល់វគ្គផ្តាច់ព្រ័ត្រ World Cup ឆ្នាំ ២០១៤ និង Copa America ២ លើកនៅឆ្នាំ ២០១៥ និង ២០១៦។ កំឡុងការបង្ហាញខ្លួន ១៣៩ ប្រកួត M10 រកបាន ៧១ គ្រាប់និង Assist ៤៧ លើក។
បង្វែរទៅជ្រុងម្ខាង ពាក់ព័ន្ធនឹងការលេងឲ្យក្រុមជម្រើសជាតិ តើអ្នកដឹងទេថា ខ្សែប្រយុទ្ធរូបនេះអាចមានសិទ្ធជ្រើសរើសរវាងជម្រើសជាតិ ២ ផ្សេងទៀតដោយរួមមានអ៊ីតាលី និងអេស្ប៉ាញ?
សិទ្ធដែលអនុញ្ញាតឲ្យលោកអាចលេងនៅអ៊ីតាលី ក៏ដោយសារតែខ្សែស្រឡាយខាងជីតារបស់លោកដែលមានដើមកំណើតក្នុងប្រទេសនោះ ស្របពេលដែលនៅប្រទេសអេស្ប៉ាញ ដោយសារតែសហព័ន្ធបាល់ទាត់នៅទីនោះ ចង់ឆក់យកឱកាសចរចាយកកីឡាករមានទេពកោសល្យដូចជាគេ។
ប៉ុន្តែ M10 ធ្លាប់បញ្ជាក់ប្រាប់ចំៗហើយថា៖ “ខ្ញុំធ្លាប់ត្រូវបានគេសួរនាំក្រៅផ្លូវការ អំពីការចង់ទៅចូលរួមលេងនៅជម្រើសជាតិអេស្ប៉ាញឬអត់ តែខ្ញុំនិយាយហើយ ខ្ញុំស្រលាញ់ប្រទេសជាតិខ្ញុំ និងឈុតអាហ្សង់ទីនគឺជាពណ៌តែមួយគត់ដែលខ្ញុំប្រើប្រាស់”៕
ប្រភព៖ SportBible