គ្រូ Newcastle ​ថា​ក្លឹប​របស់​ខ្លួន ​រាល់​ឆ្នាំ​ប្រឹង​តែ​ម៉ា​រស់​នៅ Premier League ​ប៉ុណ្ណោះ

លោក Rafael Benitez ​អ្នក​ចាត់ការ​ក្រុម Newcastle United ​បាន​និយាយ​ថា​ក្រុម​របស់​លោក ​ចង់​បាន​ត្រឹម​លេង​នៅ Premier League ​រាល់​ឆ្នាំ​ប៉ុណ្ណោះ ​ខណៈ​ដែល​រឿង​ពាន​រង្វាន់​វិញ​ពិត​ជា​នៅ​ឆ្ងាយ​ណាស់។

Benitez ​ហាក់​មិន​សប្បាយ​ចិត្ត​ចំពោះ​ការ​ដោះដូរ​កីឡាករ​របស់​ក្លឹប​ឡើយ ត្បិត​អី​មិន​បាន​ចំណាយ​ច្រើន​និង​ទិញ​កីឡាករ​តាម​ការ​ចង់​បាន​ឡើយ។ ការ​និយាយ​បែប​នេះ ​មាន​ន័យ​ថា​ទំនាក់ទំនង​រវាង​អ្នក​ចាត់ការ​ល្បី​ឈ្មោះ​ម្នាក់​នេះ ​និង​ម្ចាស់​ក្លឹប​លោក Mike Ashley ​នោះ ​គឺ​ឈាន​ដល់​ចំណុច​ក្ដៅ​ហើយ។

អតីត​អ្នក​ចាត់ការ​ក្រុម Liverpool ​និង Real Madrid ​រូប​នេះ​បាន​និយាយ​ថា​៖ “ខ្ញុំ​មាន​ទំនុក​ចិត្ត​លើ​កីឡាករ​ខ្ញុំ​បច្ចុប្បន្ន​នេះ ​ប៉ុន្តែ​ប្រសិន​បើ​យើង​ចង់​ទៅ​ឱ្យ​ឆ្ងាយ​ជាង​រដូវ​កាល​មុន​នោះ យើង​ត្រូវ​ធ្វើ​ការ​ផ្លាស់​ប្ដូរ។ យើង​មិន​អាច​យក​កីឡាករ​ដដែល ​និង​មិន​មាន​អ្វី​ថ្មី ដើម្បី​ទទួល​បាន​លទ្ធផល​ថ្មី​ឡើយ”។

គិត​ត្រឹម​បច្ចុប្បន្ន​នេះ​ Newcastle United ​បាន​ទិញ​យក​កីឡាករ​៥​នាក់​ហើយ ​ប៉ុន្តែ​នៅ​មិន​ទាន់​គ្រប់​តាម​ការ​ចង់​បាន​របស់​លោក Benitez ​នៅ​ឡើយ​ទេ។ អ្នក​ចាត់ការ​រូប​នេះ ​ចង់​បាន​កីឡាករ​បន្ថែម​ទៀត​ដើម្បី​ប្រជែង​យក​ពាន​រង្វាន់​៕ប្រភព ៖ DailyMail

 

ភ្ជាប់ទំនាក់ទំនងជាមួយ CTS SPORT