• ប្រធាន​ក្លឹប Real Madrid ​ថា ​ក្លឹប​ណា​ក៏​យក Modric ​បាន​ដែរ ​បើ​ឱ្យ​ដល់​៧៥០​លាន​អឺរ៉ូ

    លោក Florentino Perez ដែល​ជា​ប្រធាន​ក្លឹប Real Madrid ​បាន​បញ្ជាក់​ថា Luka Modric ​មិន​មែន​សម្រាប់​លក់​នោះ​ទេ ប៉ុន្តែ​បើ​ឱ្យ​តម្លៃ​ផ្ដាច់​កុងត្រា​នោះ​ក្លឹប​ក៏​មិន​អាច​ឃាត់​រូបគេ​បាន​ដែរ។

    ការ​និយាយ​បែប​នេះ គឺ​ស្មើ​ទៅ​នឹង​ការ​មិន​លក់​កីឡាករ​លេង​ល្អ​ជាង​គេ​នៅ World Cup 2018 ​នេះ​ទៅ​ហើយ ​ព្រោះ​ថា​តម្លៃ​ផ្ដាច់​កុងត្រា​ដែល​លោក Perez ​បញ្ជាក់​នោះ​គឺ​មាន​ដល់​៧៥០​លាន​អឺរ៉ូ​ឯ​ណោះ។ ​នេះ​ស​បញ្ជាក់​ថា​គ្មាន​ក្លឹប​ណា​មួយ​ចំណាយ​ដល់​ប៉ុណ្ណឹង​ដើម្បី​ទិញ​យក​កីឡាករ​ម្នាក់​ឡើយ។ ការ​និយាយ​បែប​នេះ ​របស់​ប្រធាន​ក្លឹប Real Madrid ​ដោយសារ​តែ​មាន​ក្លឹប​នៅ​អ៊ីតាលី Inter Milan ​បាន​បង្ហាញ​ការ​ចាប់​អារម្មណ៍​ទិញ​យក​ខ្សែ​បម្រើ​រូប​នេះ​ទៅ​លេង​នៅ Serie A ​នា​រដូវ​កាល​ថ្មី​ខាង​មុខ។

    Modric ​វ័យ​៣២​ឆ្នាំ​កំពុង​ទទួល​បាន​ការ​​ចាប់​អារម្មណ៍​ខ្លាំង​ពី​សំណាក់​ក្លឹប​ធំ​ៗ​ជា​ច្រើន ក្រោយ​ពី​រូបគេ​បាន​ជួយ​ប្រទេស​ក្រូអាត ​បាន​ឡើង​ដល់​វគ្គ​ផ្ដាច់ព្រ័ត្រ​ពាន​រង្វាន់ FIFA World Cup 2018 ​នេះ។ យ៉ាងណាមិញ ​ខ្សែ​បម្រើ​ឆ្នើម​ខាង​លើ​នេះ ​នៅ​សល់​កុងត្រា​ជាមួយ​អធិរាជ​ស​រហូត​ដល់​ឆ្នាំ ២០២០ ​ឯ​ណោះ ​ទើប​បាន​ជា​តម្លៃ​ផ្ដាច់​កុងត្រា​របស់​គេ​ខ្ពស់​ដល់​៧៥០​លាន​អឺរ៉ូ៕ប្រភព៖ MARCA

     

     

    ភ្ជាប់ទំនាក់ទំនងជាមួយ CTS SPORT