កាលពីប្រកួតដំបូងរបស់ Luis Suarez នៅជំនួបទល់ Granada កាលពីថ្ងៃមុន គេត្រឹមប្តូរចូលនៅពាក់កណ្តាលតង់ទីពីរ ជំនួស Diego Costa តែប៉ុណ្ណោះ ដែលរុញឲ្យមានចម្ងល់ ចង់ដឹងច្បាស់ថា តើអ្នកទាំងពីរអាចលេងរួមគ្នាបានដែរឬយ៉ាងណា?
ពាក់ព័ន្ធនឹងចម្ងល់នេះ អ្នកចាត់ការក្លឹប Atletico Madrid លោក Diego Simeone បាននិយាយថាអាចលេងបាន តែស៊ីសងលើស្ថានភាពជាក់ស្តែង ពោលមិនមែនគ្រប់សណ្ឋាននៃការប្រកួតឡើយ។
Simeon និយាយ៖ “Costa និង Suarez អាចចាប់ផ្តើមឬពួកគេអាចលេងក្នុងប្រកួតតែមួយជាមួយគ្នាបាន ប៉ុន្តែយើងក៏ត្រូវមើលថាតើត្រូវដាក់ឲ្យលេងពេលណានិងក្នុងស្ថានភាពបែបណា ដោយអ្នកទាំងពីរសុទ្ធតែសំខាន់ យើងនឹងឃើញថាតើនរណាអាចចាប់ផ្តើមនៅថ្ងៃពុធនេះ”។
សួរនាំដល់រឿងរ៉ាវ Cavani អំពីលទ្ធភាពដែលក្លឹបអាចនាំគេមកចូលរួម លោក Simone បន្ត៖ “ខ្ញុំនឹងមិននិយាយអំពីកីឡាករដែលមិនស្ថិតក្នុងបញ្ជីឈ្មោះ ឬអ្នកដែលអាចជួយយើងលេងប៉ះ Huesca បាននោះទេ ដោយគ្រប់គ្នាស្គាល់ Cavani ហើយ តែយើងសុំខ្វល់តែពីកីឡាករដែលត្រូវជួយយើងសម្រេចគោលដៅតែប៉ុណ្ណោះ”៕
ប្រភព៖ AF