ក្លឹប Juventus បានឱ្យ A C Milan ខ្ចីជើងខ្សែប្រយុទ្ធ Gonzalo Higuain ជាថ្នូរទៅនឹងការខ្ចីជើងខ្សែការពារ Leonardo Bonucci ១រដូវកាលត្រលប់មកវិញ។
gonzalo higuain
ក្លឹបបានប្រកាសកាលពីម្សិលមិញនេះ បន្ទាប់ពី Higuain ធ្វើតេស្ដសុខភាពជោគជ័យ។ ការទៅលេងនៅ AC Milan របស់គេនេះ គឺក្រោមលក្ខខណ្ឌខ្ចីជើងរយៈពេលយូរ។ ជាមួយគ្នានេះដែរ ក្លឹប Juventus ក៏បានខ្ចីជើងខ្សែការពារ Bonucci ដែលជាអតីតកីឡាកររបស់ខ្លួន១រដូវកាលមកវិញផងដែរ។ ការផ្ដើមដោះដូរកីឡាករគ្នារវាងក្រុមទាំងពីរនេះ កើតឡើងក្រោយពីវត្តមានរបស់ Cristiano Ronaldo បានទៅដល់អ៊ីតាលី ដែលធ្វើឱ្យ Juventus មានខ្សែប្រយុទ្ធគ្រប់គ្រាន់ មិនចាំបាច់ត្រូវការកីឡាករអាហ្សង់ទីនទៀតឡើយនៅរដូវកាលថ្មីខាងមុខនេះ។
leonardo bonucci
Higuain ផ្លាស់ទៅ Juventus នៅឆ្នាំ២០១៦ ក្នុងតម្លៃខ្លួន៩០លានអឺរ៉ូ បន្ទាប់ពីរូបគេរកបាន៣៦គ្រាប់ក្នុង១រដូវកាលឱ្យក្រុម Napoli ។ យ៉ាងណាមិញ ក្រោយពីមកលេងនៅ Juventus រូបគេបែរជាពិបាកស្វែងរកគ្រាប់បាល់ទៅវិញ ដែលធ្វើឱ្យអ្នកគាំទ្រមិនសប្បាយចិត្តឡើយ។ ខ្សែប្រយុទ្ធវ័យ៣០ឆ្នាំរូបនេះ ឈ្នះពានរាល់ឆ្នាំជាមួយក្រុមសេះបង្កង់ ដោយបង្ហាញខ្លួនបាន១០៥ប្រកួត ស៊ុតបាន៥៥គ្រាប់ ក្នុងរយៈពេល២រដូវកាលនេះ៕