លោក Kazuyoshi Miura មានអាយុ ៥៣ ថ្មីៗនេះទើបតែចារឈ្មោះក្នុងកំណត់ត្រានាមជាកីឡាករវ័យចំណាស់បំផុតលេងឲ្យក្របខ័ណ្ឌបាល់ទាត់ជប៉ុន J-League និងជាកីឡាករវ័យចំណាស់បំផុតក្នុងលោកដែលកំពុងបន្តឈរជើងផងដែរ។
បុរសសញ្ជាតិជប៉ុនដែលបានចុះហត្ថលេខាថ្មីរយៈពេល ១ ឆ្នាំកាលពីខែមករា ឆ្នាំ ២០២០ ជាមួយក្លឹប Yokohama FC ក៏ទើបតែបង្ហាញខ្លួននៅជំនួបទល់ក្លឹប Kawasaki ក្នុងគ្រាដែលលោកមានអាយុ ៥៣ ឆ្នាំ និង ២១០ ថ្ងៃ។
Miura ចាប់ផ្តើមប្រលូកក្នុងអាជីពបាល់ទាត់នៅឆ្នាំ ១៩៨២ ហើយបានវិវត្តខ្លួនផ្ទេរទៅចូលរួមនៅក្លឹបចាស់ថ្មីរាប់ភ្លេចមានដូចជា Santos, Genoa, Dinamo Zagreb, Sydney FC, Palmeiras និង Coritiba ជាដើម សរុបគឺឆ្លងដល់ ៥ ប្រទេសឯណោះ។
បុរសកើតឆ្នាំ ១៩៦៧ រូបនេះ មានជំនាញការលេងនៅតំណែងប្រយុទ្ធកណ្ដាល ប៉ុន្តែលោកក៏អាចលេងតំណែងផ្សេងទៀតដូចជាស្លាបប្រយុទ្ធឆ្វេងស្តាំ និងតំណែងបម្រើប្រយុទ្ធផងដែរ។ កំឡុងការចាយពេលជិត ៤០ ឆ្នាំលោកបង្ហាញខ្លួនឲ្យក្លឹបបាន ៦៦៤ ប្រកួត រកបាន ១៨៧ គ្រាប់ រីឯនៅក្រុមជម្រើសជាតិជប៉ុនរកបាន ៥៥ គ្រាប់នៅការបង្ហាញខ្លួន ៨៩ ប្រកួត។
គួរបញ្ជាក់ថា Miura គឺជាកីឡាករតែមួយរូបគត់ក្នុងជំនាន់ហ្គេម FIFA 96 ដែលនៅតែមានវត្តមានមកទល់ការអាប់ដែតដល់ហ្គេម FIFA 21 ពោលគឺកំណត់ត្រាឈរឈ្មោះដល់ទៅ ២៥ ឆ្នាំឯណោះក្នុងហ្គេមបាល់ទាត់របស់ក្រុមហ៊ុន EA Sports៕
ប្រភព៖ SportBible