Vinicius បានបង្ហាញខ្លួនជាផ្លូវការហើយសម្រាប់ក្រុម Real Madrid ក្នុងពានរង្វាន់ ICC ពេលលេងទល់ក្រុម Manchester United ប៉ុន្តែលទ្ធផលមិនគាប់ប្រសើរនោះទេគឺចាញ់ ២-១។
ត្បិតតែបរាជ័យពិតមែន ប៉ុន្តែការប្រកួតមួយនេះ ក្រុម Real Madrid បានដាក់កីឡាករក្មេងៗឱ្យចូលលេងជាច្រើននាក់ដើម្បីឱ្យពួកគេបានបញ្ចេញសមត្ថភាព។ ជាមួយគ្នានោះ គេសង្កេតឃើញថាខ្សែប្រយុទ្ធវ័យ១៨ឆ្នាំដែលក្លឹបទើបនាំយកពីប្រេស៊ីលមកVinicius ក៏បានចូលលេងនិងបង្ហាញបច្ចេកទេសរបស់ខ្លួនផងដែរ។ មិនអាចរកគ្រាប់បាល់បាន ប៉ុន្តែរូបគេត្រូវបានគ្រូបង្វឹកជឿជាក់ថាទៅថ្ងៃអនាគតនឹងជួយក្រុមបានច្រើនជាក់ជាមិនខាន។
បានការសរសើរពីគ្រូបង្វឹក យុវជនឆ្នើមខាងលើក៏បាននិយាយក្រោយចប់ការប្រកួតថា៖ “ខ្ញុំបានបំពេញក្ដីស្រមៃតាំងពីតូច ពាក់អាវ Real Madrid រួចហើយ។ គ្រប់យ៉ាងគឺល្អណាស់នៅទីនេះ ប៉ុន្តែខ្ញុំត្រូវតែពង្រឹងសមត្ថភាពបន្តទៀតសម្រាប់រដូវកាលខាងមុខ។ ខ្ញុំនឹងប្រឹងឱ្យអស់ពីសមត្ថភាពធ្វើតាមអ្វីដែលក្លឹបចង់បាន និងសម្រេចគោលបំណងលេងឈុតធំឱ្យបាន”។
កីឡាករថ្នាលយុវជនរបស់ជម្រើសជាតិប្រេស៊ីលខាងលើ ត្រូវក្លឹប Real Madrid ទិញយកពីក្លឹប Flamengo ក្នុងតម្លៃខ្លួន៤៦លានអឺរ៉ូ។ យ៉ាងណាមិញ ត្រឹមវ័យ១៨ឆ្នាំនេះរូបគេមិនទាន់ប្រាកដថាត្រូវលេងនៅឈុតយុវជនសិន ឬទៅលេងនៅឈុតធំតែម្ដងទេ ដោយត្រូវឆ្លងកាត់មើលសមត្ថភាពនៅពានរង្វាន់មិត្តភាពនេះសិន៕ប្រភព៖ MARCA