ខ្សែប្រយុទ្ធ Luis Suarez បានសម្រេចការផ្ទេរទៅលេងនៅក្រុម Atletico Madrid ហើយ ក្នុងតម្លៃខ្លួន៦លានអឺរ៉ូ កុងត្រារយៈពេល២ឆ្នាំ។ដោយសារតែលោក Koeman មិនប្រើប្រាស់ខ្សែប្រយុទ្ធខាងលើនេះ ទើបបានជាក្រុម Barcelona ត្រូវតែលក់រូបគេចេញដើម្បីមានកន្លែងសម្រាប់កីឡាករថ្មីទៀត។ ក្លឹបចង់ឱ្យ Suarez ចេញដោយគ្មានតម្លៃខ្លួនផង ប៉ុន្តែសំណាងវិញ AT Madrid យល់ព្រមទិញរូបគេក្នុងតម្លៃខ្លួន៦លានអឺរ៉ូ។ ក្នុងការទៅលេងនៅ AT Madrid នេះដែរ Suarez នឹងទទួលបានតម្លៃពលកម្ម៩លានអឺរ៉ូក្នុង១រដូវកាល។
Suarez ចូលរួមជាមួយក្រុម Barcelona តាំងពីឆ្នាំ២០១៤ មក គ្រាដែលរូបគេផ្ទេរពី Liverpool ។ ខ្សែប្រយុទ្ធរូបនេះលេងបាន២៨៣ប្រកួត និងរកបាន១៩៨គ្រាប់ឯណោះឱ្យក្រុមអ្នកមានបុណ្យ និងជួយក្រុមនេះឈ្នះពាន La Liga ៤ដង Copa del Rey ៤ដងនិង Champions League ១ដង៕