លោក Maurizio Sarri គ្រូបង្វឹកក្រុម Chelsea បាននិយាយថាមិនសប្បាយចិត្តទេ ចំពោះការត្រលប់ចូលក្រុមវិញយឺតពេលរបស់កីឡាករ Willian ដែលវិស្សមកាលក្រោយ World Cup ។
Willian កំពុងមានបញ្ហា Passport របស់គេ ដែលមិនបានចូលរួមហ្វឹកហាត់ជាមួយសមាជិកក្រុមដទៃទៀតនៅអាមេរិកបានឡើយ។ កត្តាដែលមករួមក្រុមយឺតនេះដែរ បានធ្វើឱ្យលោក Sarri ហាក់មិនសប្បាយចិត្តឡើយ ត្បិតអីក្រុមទាំងមូលត្រូវហ្វឹកហាត់រួមគ្នាឱ្យបានច្រើន ព្រោះរដូវកាលថ្មីកាន់តែកៀកចូលមកដល់ហើយ។ មួយវិញទៀត ខ្សែបម្រើរូបនេះ ក៏កំពុងមានក្លឹបជាច្រើនចង់បានផង ទើបអ្នកចាត់ការថ្មីចង់ឱ្យចូលរួមជាមួយក្រុមឱ្យបានលឿនបន្តិច។
អតីតអ្នកចាត់ការក្រុម Napoli ខាងលើបាននិយាយថា៖ “ខ្ញុំចង់និយាយជាមួយគាត់។ ខ្ញុំមិនសប្បាយចិត្តទេចំពោះការមករួមក្រុមវិញ យឺតដល់៥ថ្ងៃនេះ។ ជាមួយស្ថានភាពបែបនេះ ខ្ញុំចង់ឱ្យគាត់មកវិញឱ្យលឿននឹងបាននិយាយគ្នា”។ Willian ក្រោយពីបង្ហាញទម្រង់លេងល្អនៅ World Cup ជាមួយជម្រើសជាតិប្រេស៊ីលមក មានក្លឹបជាច្រើនចង់បានរូបគេ រួមទាំង FC Barcelona ចង់ទិញ២ដង ប៉ុន្តែមិនបានសម្រេច។ បច្ចុប្បន្ននេះ Real Madrid បានដាក់តម្លៃខ្លួន៦៥លានផោន សម្រាប់កីឡាករប្រេស៊ីលរូបនេះ៕ប្រភព៖ DailyMail
