ក្រុម Real Madrid បានបើកឆាកប្រកួតដំបូងនៅពានរង្វាន់ La Liga នាយប់មិញនេះ ដោយស្មើ ០-០ ជាមួយក្រុម Real Sociedad ប៉ុណ្ណោះ។ការប្រកួតដែលមិនមានគ្រាប់បាល់កើតឡើងនេះ បានធ្វើឱ្យមានមតិជាច្រើនយល់ឃើញថាក្រុម Real Madrid រដូវកាលនេះនឹងពិបាកមិនខាន ព្រោះពួកគេមិនមានទិញកីឡាករថ្មីឡើយ។ ដោយយកតែកីឡាករដាក់ឱ្យគេខ្ចីជើង និងប្រើប្រាស់កីឡាករចាស់ៗមានស្រាប់នៅក្នុងក្រុមប៉ុណ្ណោះ ក្នុងការលេងការពារតំណែងជើងឯក La Liga ។
តែទោះជាយ៉ាងនេះក្ដី អ្នកចាំទី Courtois នៅតែមានទំនុកចិត្តថាក្រុម Real Madrid នឹងរកគ្រាប់បាល់បានច្រើនដែលនារដូវកាលនេះ ក៏ព្រោះតែសមាជិកក្រុមទាំងអស់សុទ្ធតែមានសមត្ថភាពខ្ពស់។ ការប្រកួតប៉ះក្រុម Real Sociedad មិនមែនជាការប្រកួតងាយស្រួលឡើយ ហើយលទ្ធផលស្មើនេះក៏មិនអាក្រក់នោះដែរ៕
ប្រភព៖ Marca