Tottenham Hotspur បានបញ្ចប់ការយកឈ្នះទៅលើក្រុមម្ចាស់ដី Southampton ក្នុងលទ្ធផល ៥-២ ដែលជាការសម្រេចទី ៤ គ្រាប់ម្នាក់ឯងពីសំណាក់កីឡាករ Son Heung-min និង ១ គ្រាប់ពី Harry Kane។
កំណត់ត្រាជាច្រើនបានកើតឡើងក្នុងការប្រកួតនាល្ងាចថ្ងៃអាទិត្យមួយនោះ ហើយជាពិសេសគឺចារឈ្មោះរបស់ Son និង Kane ផ្ទាល់តែម្តង។
សម្រាប់កីឡាករកូរ៉េខាងត្បូង បានជាប់ឈ្មោះជាកីឡាករអាស៊ីដំបូងបង្អស់ដែលអាចរកបាន ៤ គ្រាប់ក្នុងប្រកួតទោលនៅ Premier League និងជាកីឡាករទី ២៨ ក្នុងប្រវត្តិសាស្ត្រលីគកំពូលអង់គ្លេស។
ផ្សាភ្ជាប់នឹងកំណត់ត្រាថ្មីនេះ Son ក៏និយាយប្រាប់ BT Sport ក្រោយចប់ការប្រកួតថា៖ “វាពិតជាអស្ចារ្យការដែលអាចរកបាន ៤ គ្រាប់នៅប្រកួតក្របខ័ណ្ឌ Premier League នេះគឺជាកិត្តិយសដ៏ធំធេងមួយ ប៉ុន្តែបើគ្មាន Kane គ្រាប់បាល់ទាំង ៤ របស់ខ្ញុំក៏មិនអាចកើតឡើងដែរ”។
ក្រឡេកទៅមើលកំណត់ត្រារបស់ Kane ឯណោះវិញ ក៏បានក្លាយជាអ្នកចូលរួមចំណែកក្នុងគ្រាប់បាល់ទាំង ៥ (Goal 1 + Assist 4) ដែលខកខានមានអ្នកធ្វើបានតាំងពីខែមិនា ឆ្នាំ ២០១៨ ដោយអ្នកគ្រោងចាស់គឺ Mohamed Salah កំឡុងការប្រកួតរវាង Liverpool ទល់ Watford។ ប៉ុន្តែនេះគឺជាលើកទី ២ ហើយដែល Kane អាចបំបែកបាន ព្រោះកន្លងមកនៅឆ្នាំ ២០១៧ ពេលលេងប៉ះ Leicester កីឡាករអង់គ្លេសក៏ធ្លាប់ធ្វើបានម្តងដែរ៕