ក្លឹប FC Barcelona នៅតែមិនអាចសងសឹកក្រុម Roma បានដដែល ដោយក្នុងពានរង្វាន់ ICC នៅអាមេរិកនេះ ពួកគេបានបរាជ័យក្នុងលទ្ធផល ២-៤ ។
នៅតង់ទី១ ត្រឹម២០នាទីដំបូង ក្រុម FC Barcelona បានគ្រប់គ្រងការប្រកួតនេះតែម្ដង ដោយធ្វើឱ្យក្រុម Roma ស្ទើរតែគ្មានបាល់លេងទៅហើយ។ ពោលគឺពួកគេរកបាន១គ្រាប់នាំមុខត្រឹមនាទី៦ ដោយកីឡាករ Rafinha ។ យ៉ាងណាមិញ ឆ្លងផុតប៉ុន្មាននាទីមកទៀត ត្រឹមនាទី៣៥ ក្រុម Roma មានឱកាសស្វែងរកបានគ្រាប់ស្មើវិញ ដោយ Shaarawy ។ ដើម្បីបញ្ចប់តង់ទី១ ក្នុងលទ្ធផលស្មើគ្នា ១-១។
ចូលដល់តង់ទី២ លោក Ernesto Valverde អ្នកចាត់ការក្រុម Barca នៅមិនទាន់ធ្វើការផ្លាស់ប្ដូរកីឡាករភ្លាមនោះទេ ដោយទុកកីឡាករលេងនៅតង់ទី១ បានលេងបន្ដទៀត ហើយក៏រកគ្រាប់បាល់បាននាំមុខទៀត ដោយ Malcom ត្រឹមនាទី៤៩។ ចង្វាក់លេងមិនមានការផ្លាស់ប្ដូរ ក្រុមទាំងសងខាងក៏សម្រេចដាក់កីឡាករថ្មីចូលដូចគ្នានៅនាទី៦០។ ការផ្លាស់កីឡាករថ្មីចូលនេះហើយ បានធ្វើឱ្យ Roma មានកម្លាំងប្រយុទ្ធថ្មី ហើយក៏រកគ្រាប់បាល់បានជាបន្ដបន្ទាប់ រហូតយកឈ្នះវិញ ក្នុងលទ្ធផល ៤-២ ឯណោះ។
នេះជាប្រកួតទី២របស់ក្រុមអ្នកមានបុណ្យហើយ ដោយប្រកួតដំបូងពួកគេប៉ះជាមួយក្រុម Spurs ដោយយកឈ្នះក្នុងលទ្ធផលបាល់ប៉េណាល់ទី។ ក្រុម Barcelona នៅមានការប្រកួត១ប្រកួតទៀតក្នុងពានរង្វាន់ ICC នេះ ដោយពួកគេនឹងប៉ះជាមួយក្រុម AC Milan នៅចុងសប្ដាហ៍នេះ៕ប្រភព៖ Barcablaugranes