ខ្សែប្រយុទ្ធ Pierre-Emerick Aubameyang បានព្រមព្រៀងលើការបន្តកុងត្រាថ្មីជាមួយក្លឹប Arsenal បន្ថែមរយៈពេល ៣ ឆ្នាំ ហើយក្នុងកិច្ចកុងត្រានោះគឺមានតម្លៃប្រមាណ ៥៥ លានផោនឬខ្ទង់ ៧០ លានដុល្លារឯណោះ។ នេះបើតាមរបាយការណ៍ពី The Times បានចុះផ្សាយ។
ចំពោះទំហំថ្លៃពលកម្មរបស់កីឡាករវ័យ ៣១ ឆ្នាំក៏ត្រូវបានគេដឹងថា មានកើនឡើងមួយកម្រិតទៀតផងដែរ។ ដោយថ្លៃពលកម្មមុនបន្តកុងត្រាទទួលបាន ១៨០ ០០០ ផោនប៉ុណ្ណោះក្នុងមួយសប្តាហ៍ តែពេលនេះកើនដល់ ២៥០ ០០០ ផោន/សប្តាហ៍ ហើយបូកប្រាក់ឧបត្ថម្ភផ្សេងៗទៀតអាចឡើងដល់ ៣៥០ ០០០ ផោន/សប្តាហ៍ឯណោះ។
បញ្ជាក់ថា Aubameyang ត្បិតបើមានអាយុរាងជ្រេហើយក្តី តែសមត្ថភាពលេងរបស់គេនៅតែជាចំណែកដ៏សំខាន់របស់កាំភ្លើងធំ Arsenal ដដែល។ នៅបើករដូវកាលជុំទី ១ កាលប៉ះ Fulham កន្លងទៅនេះ ក៏រូបគេរកបាន ១ គ្រាប់ផងដែរ៕
ប្រភព៖ Goal