លោក Zinedine Zidane មុនវិវត្តខ្លួនមកក្លាយជាអ្នកចាត់ការកំពូលមួយរូបនៅពេលបច្ចុប្បន្ន ក្រឡេកទៅអតីតកាលលោកក៏ធ្លាប់ឆ្លងកាត់អាជីពជាកីឡាករដូចអ្នកឯទៀតផងដែរ។
អតីតខ្សែបម្រើ/ប្រយុទ្ធសញ្ជាតិបារាំង ធ្លាប់លេងឲ្យក្លឹប Cannes នៅឆ្នាំ ១៩៩០ ហើយចូលនិវត្តនៅក្លឹបចុងក្រោយបង្អស់គឺ Real Madrid នាឆ្នាំ ២០០៦។ ជាមួយការបង្ហាញខ្លួនច្រើនជាង ៦០០ ប្រកួតលើទីលាន Zidane អាចរាប់ថាបានឆ្លងកាត់ការប្រកួតប្រជែងគ្រប់សព្វ មិនថាតែក្នុងនិងក្រៅស្រុក។
ធ្លាប់ប្រាប់ទៅកាន់សារព័ត៌មាន The Daily Mirror អតីតកីឡាករ Madrid រូបនេះ បានចង្អុលដល់ឈ្មោះកីឡាករ Man Utd មួយរូប ដែលលោកគិតថាជាគូប្រជែងដែលពិបាកតតាំងបំផុតលើទីលាន នោះគឺ Paul Scholes។
កីឡាករធ្លាប់ជួយឲ្យបារាំងឈ្នះជើងឯក World Cup និយាយថា៖ “Scholes គេជាគូប្រជែងដ៏ពិបាកតតាំងលើទីលាន ដោយអ្នកនឹងមិនសូវមានពេលនៅជាមួយបាល់យូរនោះទេ ប្រសិនមានគេនៅក្បែរអ្នក ពោលគេរមែងធ្វើឲ្យការលេងរបស់អ្នកលើទីលានជួបរឿងលំបាកនិងមិនស្រួលចិត្តនោះឡើយ”។
លោកសង្កត់ធ្ងន់៖ “សម្រាប់ប្រភេទកីឡាករដូចជា Scholes គឺមានតែអ្នកចង់បាន នាមជាមិត្តរួមក្រុមតែមួយ ដោយមិនចង់ក្លាយជាគូប្រជែងទេ ព្រោះគេអាចធ្វើរឿងពិសេសជាច្រើន ដែលមើលទៅហាក់ងាយស្រួល ដោយវាជាសមត្ថភាពរបស់គេពីកំណើត”៕
ប្រភព៖ SportBible