ក្រុម Juventus ចាប់ផ្ដើមងាកមកចាប់អារម្មណ៍ខ្សែប្រយុទ្ធ Olivier Giroud របស់ក្រុម Chelsea វិញហើយ បន្ទាប់ពីការចរចាយកខ្សែប្រយុទ្ធ Luis Suarez នៅជាប់គាំងមិនទាន់ទៅមុខរួច។
ប៉ុន្មានថ្ងៃមុននោះ ក្រុម Juventus តាមទិញ Suarez ខ្លាំងមែនទែន រហូតដល់មានដំណឹងថាបានយល់ព្រមលក្ខខណ្ឌផ្ទាល់ខ្លួនថែមទៀតផង។ តែបន្ទាប់ពី Messi បានសម្រេចចិត្តបន្ដលេងនៅក្រុម Barcelona ទៀតមក ក៏ស្រាប់តែការចរចានោះនៅត្រឹងមិនមានអ្វីប្រែប្រួលទៅមុខទៀតនោះទេ។ ដោយសាមីខ្លួន Suarez ក៏បានបង្ហោះថារឿងចាកចេញទាំងអស់សុទ្ធតែមិនពិតថែមទៀតផង។
ដោយសារតែមើលទៅមិនស្រួលនេះហើយ ទើបបានជាក្រុម Juventus សម្រេចចិត្តប្ដូរគោលដៅរកខ្សែប្រយុទ្ធថ្មីទៅហើយ។ ពួកគេបានមើលឃើញ Giroud របស់ក្រុម Chelsea ជាជម្រើសមួយទៀត។ ដោយសារតែ Chelsea ទិញខ្សែប្រយុទ្ធក្មេងៗមកយ៉ាងច្រើន ដូច្នេះទើបក្រុមសេះបង្កង់មើលឃើញថាឱកាសលេងរបស់កីឡាករបារាំងនេះទំនងជាមិនមានច្រើនទេ៕ប្រភព Dailymail