Yuki Nagasato ជាកីឡាការនី ធ្លាប់ជួយឲ្យក្រុមបាល់ទាត់ផ្នែកនារីជម្រើសជាតិជប៉ុនឈ្នះពាន World Cup កាលពីឆ្នាំ ២០១១ថ្មីៗនេះបានប្រែក្លាយជានារីដំបូងក្នុងលោក ដែលប្រកបអាជីពនៅក្រុមបាល់ទាត់ផ្នែកបុរស។
ស្រ្តីវ័យ ៣៣ ឆ្នាំ ជាអតីតកីឡាការនីរបស់ក្រុម Chicago Red Stars នៅឯសហរដ្ឋអាមេរិក ហើយសម្រាប់រដូវកាលថ្មីបានសម្រេចការផ្ទេរនៅលក្ខខណ្ឌខ្ចីជើង មកកាន់ក្រុមនៅឯប្រទេសជប៉ុន Hayabusa Eleven ដែលនេះជាក្រុមកម្រិតអាជីពមួយនៅប្រទេសជប៉ុន ប៉ុន្តែមិនមែនស្ថិតនៅលីគលំដាប់ទីមួយ J-League នោះឡើយ។
ប្រាប់កាលពីថ្ងៃព្រហស្បតិ៍កន្លងទៅ Nagasato និយាយថា៖ “ខ្ញុំចង់ផ្ញើសារនេះទៅកាន់ក្មេងៗស្រីទាំងអស់ ដែលកំពុងលេងបាល់ទាត់ជាមួយក្មេងប្រុសៗថា ជាការពិតណាស់នារីគឺមានសិទ្ធអាចចូលរួមលេងនៅក្រុមរបស់បុរស និងធ្វើការប្រកួតប្រជែងគ្នាបាន”។
នាងសង្កត់ធ្ងន់ ការមកចូលរួមនេះ ក៏ជាផ្នែកមួយនៃការបំផុសពីកីឡាការនីបាល់ទាត់អាមេរិកល្បីឈ្មោះគឺ Megan Rapinoe ដោយ Nagasato បន្តថា៖ “វាពិតជាបានបំផុសចិត្តគំនិតខ្ញុំខ្លាំងបំផុត នៅពេលដែលលឺអំពីការជជែកពាក់ព័ន្ធនឹងវិសមភាព Gender ហើយនិងសារដទៃទៀតដែល Rapinoe ព្យាយាមលើកមកបង្ហាញកំឡុងព្រឹត្តិការណ៍ World Cup ២០១៩”។
គួររំឭកថា បងប្រុសរបស់នាងឈ្មោះ Genki ក៏ជាអតីតកីឡាករនៅក្របខ័ណ្ឌ J-League មួយរូបផងដែរ ហើយលោកបានទម្លាយថា ការមកចូលរួមនៅក្រុមបាល់ទាត់បុរស គឺជាក្តីស្រមៃដែលមិនអាចបំភ្លេចបានមួយរបស់ Nagasatoតាំងពីដំបូងមកម្ល៉េះ បែបនេះនាមជាបងប្រុស ត្រូវតែជួយសម្រេចក្តីស្រមៃប្អូនស្រីរបស់ខ្លួនឲ្យបាន៕
ប្រភព៖ CBC | Bleacher Report