Cristiano Ronaldo និង Lionel Messi ត្រូវបានគេទទួលស្គាល់ថាជាកីឡាករបាល់ទាត់ឆ្នើម នារយៈពេលជិត ២០ ឆ្នាំចុងក្រោយនេះ។ អ្នកទាំងពីរធ្លាប់ប៉ះគ្នាលើទីលានច្រើនប្រកួតដែរ ហើយអ្វីដែលគួរឲ្យចាប់អារម្មណ៍បំផុតនោះ គឺការប្រជែងពានរង្វាន់បុគ្គលនិងកំណត់ត្រាផ្សេងៗពីមួយឆ្នាំទៅមួយឆ្នាំ។
រំឭកដល់ពេលមួយកាលពីឆ្នាំ ២០១៥ តើអ្នកធ្លាប់ដឹងទេថា Ronaldo ធ្លាប់បង្ហាញការចាប់អារម្មណ៍ចំៗដល់ជំនាញពិសេសមួយរបស់ Lionel Messi?
បង្វែរទៅព្រឹត្តិការណ៍ Ballon d’Or នៅ ៥ ឆ្នាំមុន អ្នកទាំងពីរបានផ្តល់បទសម្ភាសន៍រួមគ្នា ដោយ Messi និយាយថា៖ “Cristiano ជាកីឡាករពោរពេញដោយគុណភាព ហើយចំណុចទាំងអស់របស់គេ កីឡាករណាក៏ប្រាថ្នាចង់បានដែរ ប៉ុន្តែសម្រាប់ខ្ញុំ ខ្ញុំដឹងច្បាស់ថាខ្ញុំមានអ្វី គាត់មានអ្វី”។
រំពេចនោះ Ronaldo ក៏ទទួលបានសំណួរមួយពីអ្នកសារព័ត៌មាន ដោយត្រូវបានគេសួរថា តើចំណុចពិសេសណាមួយដែលអ្នកចង់បានពី Messi? កីឡាករព័រទុយហ្គាល់និយាយ៖ “ខ្ញុំគិតថា ជំនាញការប្រើប្រាស់ជើងឆ្វេងរបស់ Messi គឺមិនអន់នោះទេ អ៊ីចឹងអាចថាត្រង់ផ្នែកជើងឆ្វេងរបស់គេហ្នឹងហើយ”។
លោកបន្ថែម៖ “ខ្ញុំក៏មិនអន់ប៉ុន្មានដែរលើការប្រើប្រាស់ជើងឆ្វេង ប៉ុន្តែអាចថា Messi គេធ្វើបានល្អជាងខ្ញុំ”។
បញ្ជាក់ថា ពេលនោះក៏ Neymar អង្គុយជាប់អ្នកទាំងពីរដែរ ហើយបាននិយាយកាត់ថា៖ “បើខ្ញុំវិញគឺយកទាំងពីរ គឺយកជើងឆ្វេងរបស់ Messi ហើយជើងស្តាំរបស់ Ronaldo”៕
ប្រភព៖ SportBible