Memphis Depay ត្រៀមនឹងក្លាយជាកីឡាករទី ១ ដែលចុះហត្ថលេខាផ្ទេរមកចូលរួមនៅ Barcelona ក្រោមការដឹកនាំរបស់អ្នកចាត់ការថ្មីលោក Ronald Koeman។ គ្រូបង្វឹកសញ្ជាតិហូឡង់បង្ហាញការចាប់អារម្មណ៍តាំងពីថ្ងៃដំបូងនៃការមកដល់ សម្រាប់ខ្សែប្រយុទ្ធរួមសញ្ជាតិរូបនេះ។
តាមការចុះផ្សាយពីប្រភពគួរឲ្យទុកចិត្ត Fabrizio Romana អ្នកសារព័ត៌មានរបស់ Sky Sport បានឲ្យដឹងថា Depay បានព្រមព្រៀងការផ្ទេរលក្ខណៈបុគ្គលជាមួយក្លឹប Barcelona ហើយ។ បច្ចុប្បន្ននៅឡើយតែការសម្រេចរវាងភាគីក្លឹបទាំងពីរតែប៉ុណ្ណោះ។
សម្រាប់ Lyon ហាក់មិនព្យាយាមរាំងស្ទះការផ្ទេររបស់ Depay នោះទេ ផ្ទុយទៅវិញមានតែបើកផ្លូវ និងព្យាយាមរំអុកយកតម្លៃខ្លួនដ៏សមល្មមមួយតែប៉ុណ្ណោះ។
ប្រាប់ពីនាយកជាន់ខ្ពស់ផ្នែកកីឡានៅក្លឹប Lyon លោក Juninho Pernambucano បាននិយាយបែបបើកផ្លូវបែបនេះថា៖ “នៅពេលដែលកីឡាករវ័យ ២៦ ឆ្នាំសល់កុងត្រាតែមួយឆ្នាំ ហើយ Barca កំពុងតាមចង់បានគេ គឺ Lyon មានតែយករឿងហ្នឹងទៅសិក្សាលម្អិត ហើយវាពិតជាពិបាកនឹងបដិសេធទៅកាន់ Barcelona ណាស់”៕
ប្រភព៖ BeSoccer