ប្រធានគ្រប់គ្រងផ្នែកកីឡាលោក Juninho Pernambucano បាននិយាយម្តងហើយម្តងទៀតថា លោកចង់ឃើញកីឡាករ Karim Benzema មកចូលនិវត្តនៅក្លឹបក្នុងប្រទេសកំណើត Lyon នៅពេលខាងមុខ។
Benzema ធ្លាប់ចាយពេល ៤ ឆ្នាំ នៅ Lyon ហើយបង្ហាញខ្លួនឲ្យឈុតធំ ១៤៨ ប្រកួត និងរកបាន ៦៦ គ្រាប់ មុនផ្ទេរមក Real នៅឆ្នាំ ២០០៩។
ប្រាប់ទៅកាន់សារព័ត៌មាន RMC Sport លោក Juninho មានប្រសាសន៍ថា៖ “ក្តីស្រមៃដែលក្លឹបយើងមាន គឺចង់បាន Benzema មកចូលនិវត្តជាមួយពួកយើង ហើយវាក៏ជាក្តីស្រមៃដែលអ្នកគាំទ្រក្លឹប Olympique de Lyon ទាំងអស់ ចង់់ឃើញគាត់ត្រលប់មកវិញបាន ២ រដូវកាលអីដែរ”។
លោកបន្តទៀតថា៖ “យើងចង់បាន Benzema ឲ្យមកលេង Champions League និងដើរតួជាអ្នកនាំមុខ ហើយអាចរកគ្រាប់បាល់ ក៏ដូចជាជួយឲ្យពួកយើងឈ្នះការប្រកួតជាច្រើន”។
បញ្ជាក់ថា កុងត្រារបស់ Benzema នៅ Real Madrid សេសសល់ដល់ថ្ងៃទី ៣០ មិថុនា ឆ្នាំ ២០២២។ ជាមួយក្លឹបនៅអេស្ប៉ាញ គេបង្ហាញខ្លួន ៥១៣ ប្រកួត រកបាន ២៤៩ គ្រាប់និង Assist ១៣៥ លើកហើយ៕ ប្រភព៖ BeSoccer