ក្លឹប Real Madrid បានសម្រេចបើកភ្លើងខៀវ ក្នុងការលក់ចេញ Gareth Bale ជាមួយតម្លៃខ្លួនទាបត្រឹម ២២ លានផោន ក្រោយទប់នឹងការចំណាយលើថ្លៃពលកម្មរបស់កីឡាករសញ្ជាតិវែលលែងជាប់។
មួយសប្តាហ៍នៅ Madrid ខ្សែប្រយុទ្ធស្លាបរូបនេះ ស៊ីថ្លៃខ្ទង់ ៦០០ ០០០ ផោនឯណោះ ហើយគេក៏លែងជាចំណែកសំខាន់របស់ក្លឹបតទៅទៀតដែរ។ រដូវកាលចាស់ ២០១៩/២០ កីឡាករវ័យ ៣១ ឆ្នាំបង្ហាញខ្លួន ២០ ប្រកួត រកបាន ៣ គ្រាប់និង Assist ២ លើក នៅការឈរជើងរយៈពេល ១ ២៦០ នាទីលើទីលាន។
ក្រឡេកទៅមើលចចាមអារ៉ាមលើទីផ្សារដោះដូរ គឺមានក្លឹបធំៗ ២ នៅអង់គ្លេស ទំនងជាលូកដៃក្នុងការចរចានេះ ពោលរួមមាន Manchester United ឬអាចជាអតីតក្លឹបចាស់ Tottenham Hotspur។ និយាយពីតម្លៃផ្ទេរ ត្រឹម ២២ លានផោនអាចថាមិនជាបញ្ហាឡើយ អ្វីដែលសំខាន់គឺការចរចាលើថ្លៃពលកម្មដែលខ្ពស់កប់ពពក ជាមួយកីឡាករផ្ទាល់។
គួរបញ្ជាក់ថា ទើបតែឆ្នាំ ២០២០ នេះទេ ដែល Madrid សម្រេចបើកដៃឲ្យកីឡាករមួយចំនួនចាកចេញ ដោយថ្មីៗនេះទើបតែសម្រេចលើការលក់ James Rodriguez ឲ្យទៅក្លឹប Everton មួយដែរ រុញឲ្យទំហំចំណាយលើថ្លៃពលកម្មចុះមកសល់ត្រឹម ៣១២ លានផោន/រដូវកាល៕
ប្រភព៖ SportBible