ក្លឹប Brescia បានព្រមព្រៀងក្នុងការដាក់ឲ្យខ្ចីជើងនៅខ្សែបម្រើ Sandro Tonali ទៅកាន់ក្លឹប AC Milan ជាមួយតម្លៃផ្ទេរ ១០ លានអឺរ៉ូ បន្ថែមនឹងសិទ្ធទិញផ្តាច់នៅតម្លៃជាង ១៥ លានអឺរ៉ូនាទីផ្សារដោះដូររដូវក្តៅឆ្នាំក្រោយ។
Tonali កន្លងមកជាយុវជនដ៏សកម្មមួយរូប នៅក្លឹប Brescia ដោយរដូវកាលចាស់ គេបង្ហាញខ្លួនបាន ៣៦ ប្រកួត រកបាន ១ គ្រាប់និង Assist ៧ លើក ឈរជើងលើទីលានសរុប ៣ ០១៨ នាទី។
ថ្លែងប្រាប់ក្រោយចុះហត្ថលេខាជោគជ័យ នាយកប្រតិបត្តិក្លឹប AC Milan លោក Ivan Gazidis និយាយ៖ “Tonali ជាយុវជនដ៏មានទេពកោសល្យមួយរូបក្នុងពិភពបាល់ទាត់ ដោយគេមានក្តីស្រលាញ់សម្រាប់ក្លឹបរបស់យើង ហើយយល់ច្បាស់ពីតម្លៃរបស់វា ដែលនឹងបន្ថែមទៅក្នុងរឿងដែលយើងចង់កសាងវាទាំងអស់គ្នា”។
បញ្ជាក់ថា យុវជនវ័យ ២០ ឆ្នាំរូបនេះ នៅឆ្នាំចាស់ ២០១៩ ក៏ធ្លាប់ល្ហៀងៗចចាមអារ៉ាមចង់បានពីសំណាក់ក្លឹបធំៗនៅអឺរ៉ុប មានដូចជា Man City/Man Utd/Inter Milan/Liverpool និង Juventus ផងដែរ មុន AC យកបានសម្រេច៕ ប្រភព៖ AF