Gareth Southgate អ្នកចាត់ការក្រុមជម្រើសជាតិអង់គ្លេស បាននិយាយថា រឿងរ៉ាវរបស់ Phil Foden និង Mason Greenwood នាំនារីឡើងសណ្ឋាគារក្នុងកំឡុងស្ថានភាពជំងឺ COVID-19 គឺទាមទារឲ្យលោកត្រូវការពេលដើម្បីកសាងទំនុកចិត្តឡើងវិញ។
បច្ចុប្បន្ន Foden និង Greenwood កំពុងទទួលការរិះគន់ជាខ្លាំងពីសំណាក់អ្នកគាំទ្រ ហើយនៅជម្រើសជាតិក៏ត្រូវកាត់ឈ្មោះចេញមួយរយៈ និងរងការពិន័យជាប្រាក់មួយចំនួនផងដែរ។
លោក Southgate ត្បិតបើទទួលយកការសូមអភ័យទោសពីកីឡាករទាំងពីរក្តី ប៉ុន្តែលោកនៅតែនិយាយបែបនេះថា៖ “ខ្ញុំបាននិយាយជាមួយពួកគេហើយ ដោយពួកគេក៏យល់ហើយដែរថារឿងដែលបានកើតឡើងវាមិនអាចទទួលយកបាន ព្រោះស្ថិតក្នុងស្ថានភាពវីរុសកូវីដ-១៩ ដោយខ្ញុំពិតជាមិនយល់ពីពួកគេទាល់តែសោះ”។
លោកបន្ត៖ “គ្រាន់ថាពេលនេះពួកគេត្រូវការ ការគាំទ្រ និងកសាងទំនុកចិត្តទៅលើពួកគេឡើងវិញ យ៉ាងណាមិញរឿងនេះវាត្រូវការពេល ដើម្បីសាងភាពជឿជាក់ខ្លះត្រលប់មកដូចដើម”៕ ប្រភព៖ AF