ក្រុមបាល់ទាត់ Cambodian Fan Club All Stars (CFA) បានចាប់ដៃជាមួយក្រុម NIDER FC, The Blue Warriors និង ស្ទាំងភ្លើងក្មេងវត្តក្តីចាស់ ត្រៀមបើកកម្មវិធី <<ប្រកួតមិត្តភាពសប្បុរសធម៌>> ដែលនឹងប្រព្រឹត្តិទៅនៅថ្ងៃសៅរ៍ ទី ១៩ ខែកញ្ញា ឆ្នាំ ២០២០ ក្នុងគោលដៅរៃអង្គាសថវិកាយកទៅជួយដល់ប្អូនស្រី វ៉ែន ចាន់រ៉ា ដែលមានជីវភាពក្រីក្រគ្មានលទ្ធភាពព្យាបាលជំងឺ។
បច្ចុប្បន្នប្អូនស្រី វ៉ែន ចាន់រ៉ា រស់នៅក្នុងភូមិពោល្បំ ឃុំត្រពាំងជង ស្រុកបាកាន ខេត្តពោធិ៍សាត់ ហើយត្រូវការថវិកាចាំបាច់ ដើម្បីយកទៅវះកាត់ជំងឺដុះសាច់លើផ្ទៃមុខកម្រិតធ្ងន់។
ស្ថាបនិកបង្កើតក្រុម CFA លោក អៃ សំអូន បានបង្ហើបថា៖ “តំណាងសមាជិកក្រុមបាល់ទាត់ CFA ទាំងអស់សូមអំពាវនាវដល់ លោកគ្រូអ្នកគ្រូពេទ្យ លោកវេជ្ជបណ្ឌិត ឯកឧត្ដម លោកជំទាវ អ្នកឧកញ៉ា និង សប្បុរសជនដែលមានទឹកចិត្តសប្បុរសធម៌ទាំងអស់ មេត្តាជួយយកប្អូនស្រីទៅព្យាបាលផង ព្រោះគ្រួសារគាត់មានជីវភាពក្រីក្រ គ្មានលទ្ធភាពរ៉ាប់រងថ្លៃព្យាបាលទេ”។ អ្នកអាចចូលរួមឧបត្ថម្ភបានតាមរយៈគណនី ABA: Aiy Somoun => 001 061 334 និង ACELEDA ទាន់ចិត្ត => 096 225 05 88។
គួររំឭកថា នេះជាកម្មវិធី <<ប្រកួតមិត្តភាពសប្បុរសធម៌>> លើកទី ៣ ហើយដែលក្រុម CFA បានបង្កើតឡើង ហើយពីមួយលើកទៅមួយលើកសន្ទុះគាំទ្រពីសំណាក់សប្បុរសជន បន្តមានកំណើនគួរឲ្យកត់សម្គាល់។ នៅថ្ងៃទី ១៩ កញ្ញាខាងមុខនេះ ក៏ជាខួបមួយឆ្នាំ សម្រាប់ការចាប់ផ្តើមនៃក្រុមបាល់ទាត់ Cambodian Fan Club All Stars ផងដែរ៕