Pierre-Emerick Aubameyang ជាកីឡាករដ៏សកម្មមួយរូបរបស់ Arsenal និងជាចំណែកយ៉ាងសំខាន់ជួយឲ្យក្រុមឈ្នះពាន FA Cup កាលពីពេលកន្លងទៅ។ ខ្សែប្រយុទ្ធវ័យ ៣១ ឆ្នាំ នៅរដូវកាលចាស់ ២០១៩/២០ បង្ហាញខ្លួនឲ្យក្រុម ៤៤ ប្រកួត រកបាន ២៩ គ្រាប់និង Assist ៣ លើក។
ជឿថាអ្នកគាំទ្រភាគច្រើន ប្រាកដជាត្រឹមបានដឹងពីសមត្ថភាពលេងរបស់ខ្សែប្រយុទ្ធសញ្ជាតិហ្គាប៊ុងនៅលើទីលាន ប៉ុន្តែបើស៊ីជម្រៅដល់រឿងរ៉ាវជីវិត និងការពិតខ្លះៗពី Aubameyang ប្រហែលមិនសូវមានអ្នកធ្លាប់បានដឹងនោះឡើយ។ CTS Sports ធ្វើការបង្ហាញ ៤ ចំណុចដូចតទៅ៖
៤) ស្នាមសាក់លើដៃនិងខ្នង
ស្នាមសាក់ចំនួន ២ ដែលគេរមែងឃើញដក់ជាប់នៅលើខ្លួនរបស់ Aubameyang យូរបំផុត គឺមានមួយនៅលើផ្នែកខ្មងដៃ ដោយសាក់ជាភាសាអង់គ្លេសថា៖ “Crespo For Life”។ អត្ថន័យរបស់វាគឺសំដៅដល់បុគ្គលគំរូ ដែលអតីតកីឡាករបាល់ទាត់ជើងចាស់គឺខ្សែប្រយុទ្ធអាហ្សង់ទីនលោក Hernan Crespo ពោល Aubameyang ស្រលាញ់និងគោរពដល់បុរសម្នាក់នេះខ្លាំងបំផុត។ ដោយឡែកនៅផ្នែកខ្នងខាងក្រោយរបស់គេ គឺបន្សល់ស្នាមសាក់ដ៏ធំមួយ ជាអត្តសញ្ញាណនៃទ្វីបអាហ្វ្រិក។
៣) មូលហេតុដែលពាក់ម៉ាស Superhero ពេលអបអរគ្រាប់បាល់
អ្នករមែងឃើញ Aubemeyang រមែងពាក់ម៉ាសមុខរបស់តួអង្គ Superhero ផ្សេងៗពីគ្នា កំឡុងអបអរគ្រាប់បាល់បញ្ចូលទី ហើយនៅពីក្រោយហេតុផលនោះ គឺដោយសារលោកចង់ផ្ញើក្តីស្រលាញ់ទៅកាន់កូនប្រុសរបស់ខ្លួន ដែលជាក្មេងចូលចិត្តអានសៀវភៅអំពីរឿងរ៉ាវវីរបុរសផ្សេងៗក្នុងខ្សែភាពយន្ត។
២) លឿនទាំងក្នុងនិងក្រៅទីលាន
ដូចអ្នកបានដឹងស្រាប់ហើយ Aubameyang ជាកីឡាករល្បឿនលឿនមួយរូបលើទីលានប្រកួត ដោយគេក៏ស្ថិតក្នុងបញ្ជីឈ្មោះកីឡាកររត់លឿនបំផុតមួយរូបផងដែរ ដោយអាចប្រើប្រាស់ល្បឿនអតិបរមាឡើងដល់ ៣៥,៥ គ.ម/ម៉ឯណោះ។
ក្នុងជីវិតពិត Aubameyang ក៏ចូលចិត្តប្រើប្រាស់រថយន្តដែលមានល្បឿនលឿនដូចគ្នា ហើយក្នុងចំណោមរថយន្តជាច្រើនរបស់លោក មានមួយជាម៉ាក Lamborghini Aventador ដែលប្រភេទនេះមានល្បឿនស្ទុះពី ០-៩៧ គ.ម/ម៉ ប្រើពេល ២,៩ វិនាទី ហើយអាចរត់ក្នុងល្បឿនអតិបរមាឡើងដល់ ៣៤៩ គ.ម/ម៉។
១) ធ្លាប់ជាមនុស្សស្រលាញ់ការលេងម៉ូតសក់
មុនផ្ទេរមក Arsenal សម្រាប់ម៉ូតសក់ Aubameyang គឺគេរមែងប្តូរឥតល្ហែរ ហើយសុទ្ធសឹងជាម៉ូតសក់ប្លែកខុសពីកីឡាករដទៃ បើនិយាយឲ្យស្រួលស្តាប់ទៅ Aubameyang ប្រហែលនឹង Pogba ដែរ រឿងលេងម៉ូតសក់នេះ។ ប៉ុន្តែក្រោយផ្លាស់មកចូលរួមនៅទឹកដី Emirate Stadium គេហាក់មិនសូវឃើញ ខ្សែប្រយុទ្ធចាស់វស្សារូបនេះ លេងម៉ូតសក់ច្រើនដូចមុនទៀតឡើយ៕
ប្រភព៖ Sokkaa