លោក Lopetegui បានចូលមកដឹកនាំក្រុម Real Madrid ស្របពេលដែលខ្សែប្រយុទ្ធ Cristiano Ronaldo ដល់ពេលត្រូវចាកចេញទៅលេងនៅ Juventus ។
ជាមួយនឹងការចូលដឹកនាំក្រុមមួយរយៈមកនេះ អ្នកចាត់ការខាងលើនៅមិនទាន់ទិញចូលកីឡាករកំពូលណាម្នាក់នៅឡើយទេ ដោយបច្ចុប្បន្នមានត្រឹមកីឡាកររដូវកាលមុន ប៉ុណ្ណោះក្នុងសមាជិកក្រុម ឬថែមយុវជនមួយចំនួនទៀត។ ក្លឹប Real Madrid នឹងនាំថ្នាលយុវជនរបស់ខ្លួននិងកីឡាករសំខាន់មួយចំនួនទៀត ទៅប្រកួតពានរង្វាន់ ICC នៅអាមេរិកនាចុងសប្ដាហ៍នេះ។
ទន្ទឹមនឹងនេះដែរ លោក Lopetegui បាននិយាយថាលោកសប្បាយចិត្តចំពោះការដឹកនាំក្រុមមួយដោយមិនមានកីឡាករខ្លាំង Cristiano Ronaldo ។ លោកចង់បង្កើតក្រុមមួយឱ្យខ្លាំង ដោយមិនមានកីឡាករកំពូល ហើយវាគឺជាស្នាដៃមួយកម្រមានខ្លាំងណាស់។ លោក រំពឹងថាថ្នាលយុវជនរបស់ Real Madrid នឹងបង្ហាញសមត្ថភាពរបស់ខ្លួនឱ្យអស់នៅពានរង្វាន់មិត្តភាពនេះ។
ត្បិតតែយ៉ាងនេះក្ដី ក្លឹប Real Madrid ផ្ទាល់បានបញ្ជាក់ថាពួកគេនឹងទិញខ្សែប្រយុទ្ធមករួមក្រុមម្នាក់ទៀត ប៉ុន្តែមិនទាន់បានបញ្ជាក់ច្បាស់នៅឡើយទេ។ ការបង្ហើបនេះ ធ្វើឡើងដោយលោក Perez ប្រធានក្លឹបអធិរាជសផ្ទាល់តែម្ដង៕ប្រភព៖ MARCA
