លោក Luis Enrique បានអះអាងថាយុវជន Ansu Fati ត្បិតតែនៅក្មេងមែន ប៉ុន្តែរូបគេពោរពេញដោយសមត្ថភាព និងមានទំនុកចិត្តខ្ពស់មែនទែនក្នុងការលេង។
Ansu Fati នៅយប់មិញនេះរកបាន១គ្រាប់ក្នុងជ័យជម្នះអេស្ប៉ាញ ៤-០ លើក្រុមអ៊ុយក្រែន។ កីឡាករលេងនៅក្លឹប FC Barcelona រូបនេះ ក៏បានក្លាយជាកីឡាករវ័យក្មេងជាងគេក្នុងប្រវត្តិសាស្ត្រក្រុមអេស្ប៉ាញផងដែរ ដែលរកគ្រាប់បាល់បាន។ យុវជនវ័យ១៧ឆ្នាំនេះ ត្រូវបានគ្រូបង្វឹក Enrique សរសើរមិនដាច់ពីមាត់ទេ សម្រាប់ការបង្ហាញទម្រង់លេងល្អនេះ។
លោក Enrique បាននិយាយថា៖ “ពេលយើងជ្រើសកីឡាករ យើងមិនគិតពីអាយុឡើយ។ វាមិនមែនមានន័យថា Fati មិនដែលមានកំហុសឡើយ ប៉ុន្តែវាគឺជាបទពិសោធសម្រាប់គេ។ គាត់នៅក្មេង ប៉ុន្តែគាត់មានទំនុកចិត្តខ្ពស់មិនមែន គាត់សប្បាយចិត្តក្នុងការប្រកួត។ ខ្ញុំពិតជាសរសើរគាត់មែនទែន”៕ប្រភព Goal