នៅថ្ងៃទី ៦ មិនា ឆ្នាំ ២០១៩ ក្លឹបហូឡង់ Ajax បានបង្កើតប្រវត្តិសាស្ត្រមិននឹកស្មានដល់មួយ ដោយយកឈ្នះទៅលើក្រុមឈ្នះជើងឯក UCL ១៣ សម័យកាល Real Madrid នៅលទ្ធផល ៤-១ ឆ្មក់បានកៅអីឡើងទៅកាន់វគ្គ ៨ ក្រុមចុងក្រោយ។
ជាមួយជ័យជម្នះកាលនោះ ក៏បានធ្វើឲ្យក្លឹបធំៗនៅតំបន់អឺរ៉ុបជាច្រើន ចាប់ផ្តើមបង្វែរក្រសែភ្នែកមកសិក្សាពីគុណភាពលេងរបស់បណ្តុំយុវជនក្មេងៗរបស់ Ajax ខណៈត្រឹមរយៈពេលតែជាង ១ ឆ្នាំមកនេះ ឈុត ១១ រូបដែលប្រើយកឈ្នះលើ Real Madrid មានដល់ទៅ ៥ រូបហើយដែលត្រូវបានក្លឹបដទៃចូលស្តីយកចេញពីទឹកដីហូឡង់។ ក្នុងនោះមានដូចជា៖
- ខ្សែការពារ: Matthijs de Ligt ផ្ទេរទៅ Juventus នៅតម្លៃ ៨៥,៥ លានអឺរ៉ូ
- ខ្សែបម្រើ: Lasse Schone ផ្ទេរទៅ Genoa នៅតម្លៃ ១,៥ លានអឺរ៉ូ
- ខ្សែបម្រើ: Frenkie de Jong ផ្ទេរទៅ Barcelona នៅតម្លៃ ៧៥ លានអឺរ៉ូ
- ខ្សែបម្រើ: Hakim Ziyech ផ្ទេរទៅ Chelsea នៅតម្លៃ ៤០ លានអឺរ៉ូ
- ខ្សែបម្រើ: Donny van de Beek ផ្ទេរទៅ Man Utd នៅតម្លៃ ៣៩ លានអឺរ៉ូ
គួរបញ្ជាក់ថាការចាកចេញរបស់អ្នកទាំង ៥ រូបខាងលើ សុទ្ធសឹងតែនាំផលចំណេញដល់ក្លឹប Ajax ទាំងស្រុង ព្រោះភាគច្រើនពួកគេជាកីឡាករវិវត្តខ្លួនចេញពីថ្នាលយុវជនដែលមានតម្លៃខ្លួនទាប និងខ្លះផ្ទេរចេញនៅលក្ខខណ្ឌឥតតម្លៃខ្លួនក៏មាន៕